Biashara United, Dodoma Jiji FC watoka sare tena

Imewekwa tarehe: May 17th, 2021

TIMU ya mpira wa miguu ya Dodoma Jiji imefanikiwa kuondoka na alama moja katika uwanja wa Karume Mkoani Mara baada ya kutoka sare ya 1 – 1 dhidi ya klabu ya Biashara United ya Mkoani humo.

Biashara wao ndio walikua wa kwanza kupata goli katika dakika ya 17 ya mchezo goli lililofungwa na Lenny Kisu na baadae Dodoma Jiji kusawazisha kupitia kwa mshambuaji wake hatari Seif Karihe mnamo dakika ya 47 ya pambano hilo na kufanya mchezo huo kumalizika kwa sare pacha.

Akizungumza baada ya mchezo huo Kocha Mkuu wa Dodoma Jiji Mbwana Makata amewapongeza wachezaji wake kwa mchezo huo na kwa matokeo hayo kwani mchezo ulikua mgumu ila wameambulia alama moja.

“Mchezo ulikua mgumu sana lakini vijana wamepambana na kupata alama moja tena tukitokea nyuma japo malengo yalikua ni kuondoka na alama zote tatu ila sio mbaya sana tumepata moja” alisema Makata.

Timu hizi zilitosa sare pia katika pambano lao la kwanza lililofanyika kwenye dimba la Jamhuri Jijini Dodoma kwa kufungana mabao 1 – 1.

Dodoma Jiji FC imeanza safari ya kurejea Jijini Dodoma na Jumanne itaanza safari nyingine kuwafuata Ihefu Jijini Mbeya mchezo utakaochezwa siku ya tarehe 20/05/2021.