CMT Jiji la Dodoma yapongezwa ukusanyaji mapato

Imewekwa tarehe: June 17th, 2022

Na. Dennis Gondwe, DODOMA

TIMU ya Menejimenti ya Halmashauri ya Jiji la Dodoma (CMT) imepongezwa kwa kazi nzuri katika ukusanyaji wa mapato ya ndani na kukumbushwa kusimamia taratibu za utumishi ili kuwa na mafanikio.

Kauli hiyo imetolewa na Katibu Tawala Mkoa wa Dodoma, Dkt. Fatuma Mganga alipokuwa akiongea na Timu ya Menejimbenti (CMT) ya Halmashauri ya Jiji la Dodoma katika ukumbi wa mikutano wa jiji hilo leo.

Dkt. Mganga alisema “niwapongeze CMT yenu kwa ukusanyaji mzuri wa mapato. Nyie si watumishi tu, bali ni viongozi. Kupata neema ya uongozi si masihara. Wakuu wa idara mnatakiwa kumsaidia Mkurugenzi kutekeleza majukumu yake kwa kusimamia taratibu na sheria za utumishi wa umma”.

Aidha, amewataka wakuu wa idara na vitengo wa Halmashauri ya Jiji la Dodoma kufanya vikao vya kazi wa wafanyakazi walio chini yao ili kujadili utendaji kazi. Ametoa mfano kwa kusema “Ni vizuri migao ya fedha za matumizi ya kawaida ziwekwe wazi kwa watumishi wote na siyo viongozi kugawa wenyewe bila wafanyakazi waliochini yenu kuwa na taarifa. Uwazi wa kushirikishana katika utendaji kazi huwa unasaidia kupata usaidizi wa mawazo na kuyasimamia. Tubadilike katika eneo hili, kila mmoja apangiwe kazi kwa uwazi na kupimwa utendaji wake na kupongezwa utekelezaji wake” alisema Dkt. Mganga.

Kwa upande wake Mkurugenzi wa Halmashauri ya Jiji la Dodoma, Joseph Mafuru alisema kuwa lengo la CMT ya jiji hilo ni kutoa huduma bora kwa wananchi. “Sisi Halmashauri ya Jiji la Dodoma, wananchi wote ni wetu na tuna wajibu wa kuwahudumia. Niishukuru TAMISEMI na Ofisi yako kwa kutupatia watumishi wazuri. Mimi kwenye timu yangu sioni mtumishi ambae ni mzigo. Ndugu Katibu Tawala Mkoa nikuhakikishie kuwa ndani ya miezi michache utaona matokeo ya kazi. Tunayo magari ya kutosha na tumeagiza mitambo ambayo itaingia mwezi Julai, kwa hiyo kazi zetu tutazitekeleza ipasavyo. Tunataka tabia hii ya utendaji wa kazi wa CMT tuihamishie kwa wafanyakazi walio chini yetu” alisema Mkurugenzi Mafuru.

Katibu Tawala Mkoa amefanya ziara katika Halmashauri ya Jiji la Dodoma kuongea na CMT na Wafanyakazi kwa nyakati tofauti ikiwa ni utekelezaji wa maelekezo ya serikali katika maadhimisho ya wiki ya Utumishi wa Umma iliyoanza tarehe 16-23 Juni, 2022.