CRDB Bank Taifa Cup 2021 yaanza Chinangali Park Dodoma

Imewekwa tarehe: November 5th, 2021

• Wenyeji Dodoma waanza kwa kishindo

MASHINDANO ya mpira wa kikapu ya CRDB Bank Taifa Cup 2021 yamefunguliwa leo na Mhe. Innocent Bashungwa, Waziri wa  Sanaa, Utamaduni na Michezo.

Mchezo wa ufunguzi ulizikutanisha timu za Mkoa wa Dodoma na Arusha, ambapo Dodoma iliibuka na ushindi wa vikapu 97 kwa 74. Matokeo ya michezo mingine kwa upande wa wanaume ilikuwa Kilimanjaro 61 - 64 Dar es Salaam, Pwani 65 - 90 Dar es Salaam na CRDB Youth 61 - 53 Manyara. Kwa upande wa wanawake Dodoma ilianza vyema kwa kuitandika timu ya Iringa kwa vikapu 93 dhidi ya 31. 

Mashindano haya yanafanyika katika viwanja vya Chinangali Park, Jijini Dodoma kuanzia leo tarehe 5 hadi 14 Novemba, 2021. Wadhamini wakuu wa mashindano haya ni benki ya CRDB wakishirikiana na GSM, PSSSF, SANLAM Insurance, Tulia Trust, Azam Media, Chuo Kikuu cha Dodoma na wadau wengine.

Ratiba ya mashindano haya inaonesha kuwa kila siku mchezo wa kwanza utakuwa unaanza saa 4 asubuhi na mchezo wa mwisho saa 2 usiku. CRDB Bank Taifa Cup inaoneshwa mubashara na Azam Televisheni na kwa njia ya mtandao kupitia Azam Max App.

Mashindano haya yanatarajiwa kufungwa tarehe 14 Novemba, 2021, na Waziri Mkuu wa Jamhuri ya Muungano wa Tanzania, Mhe. Kassim Majaliwa Majaliwa.