DC Dodoma apongeza usafi Soko la Job Ndugai

Imewekwa tarehe: August 11th, 2021

Na. Getruda Shomi, DODOMA

MKUU wa Wilaya ya Dodoma, Mhe. Jabir Shekimweri (aliyevaa koti) ametoa pongezi kwa uongozi wa Soko la Job Ndugai kwa kusimamia vizuri usafi wa soko, mandhari na usalama kwa kufunga kamera za usalama ili kuhakikisha ulinzi na usalama wa wateja,  wafanyabiashara na biashara zao.

Ametoa pongezi hizo wakati alipofanya ziara ya kutembelea na kukagua miradi mbalimbali ya maendeleo inayotekelezwa na serikali na ziara iliyomfikisha Soko Kuu la Job Ndugai.

Akikagua mradi huo Shekimweri ametoa ushauri kwa Meneja wa Soko hilo kuangalia namna ya kuongeza mapato. Alisema kuwa soko hilo liangalie jinsi ya kuwavutia wafanyabiashara wengi zaidi kuweka biashara zao katika soko hilo ambapo itasaidia kukuza mapato ya soko hilo.

Licha ya pongezi hizo Shekimweri amesema kuwa eneo hilo bado halijachangamka kibiashara. Alishauri kuwa wafanyabiashara waendelee kushawishiwa ili kwenda kuweka biashara zao. Aidha, aliwataka wafanyabiashara wa soko hilo kuhakikisha wanachukua tahadhari zote dhidi ya UVIKO-19 kwa kuweka maji tiririka, sabuni na kuvaa barakoa muda wote wawapo eneo la soko. Aliwasisitiza makundi vipaumbele vya chanjo wajitokeze kuchanja. Wafanyabiashara wasiofuata agizo hilo wasiruhusiwe kufanya biashara kwenye soko hilo, aliagiza.

Kwa upande wake, Meneja wa Soko Kuu la Job Ndugai, Fransic Amour katika risala yake aliainisha changamoto zinazolikabili soko hilo kuwa ni mwitikio mdogo wa wafanyabiashara. Mwitikio mdogo umepelekea vizimba vingi kuwa wazi na mapato kupungua kulingana na mategemeo.