Dkt. Charles Mahera azindua mafunzo ya kuwajengea uwezo walimu wa Elimu ya Awali

Imewekwa tarehe: December 23rd, 2024

NAIBU Katibu Mkuu wa Wizara ya Elimu, Sayansi na Teknolojia, Dkt. Charles Mahera amezindua mafunzo ya kuwajengea uwezo walimu wa Elimu ya Awali, yaliyofanyika katika Shule ya Sekondari Sokoine Memorial, mkoani Morogoro.

Mafunzo haya yameandaliwa na Ofisi ya Rais -TAMISEMI pamoja na Wizara ya Elimu, Sayansi na Teknolojia kupitia programu ya uboreshaji wa elimu ya Awali na Msingi (BOOST) yaliyolenga kuboresha ubora wa elimu ya awali nchini.

Akizungumza katika hafla hiyo, Dkt. Mahera amesisitiza umuhimu wa elimu ya awali kama msingi wa maendeleo ya mtoto.

“Tafiti mbalimbali zinaonesha kuwa elimu ya awali ina mchango mkubwa katika maendeleo ya kiakili, kimwili, kijamii, na kihisia kwa watoto,”. Amesisitiza Dkt.Mahera

Dkt. Mahera amewashukuru wadau wa elimu, wakiwemo Benki ya Dunia, UNICEF, na USAID, kwa kushirikiana na serikali katika kuboresha elimu ya awali. Alitoa wito kwa walimu kutumia maarifa watakayopata kuleta mabadiliko chanya kwa watoto na kuhakikisha elimu ya awali inakuwa msingi thabiti wa maendeleo yao

Aidha, zaidi ya walimu 9,000 kutoka mikoa 26 ya Tanzania Bara wanashiriki mafunzo haya ambapo mada zinazofundishwa ni pamoja na mbinu za kufundisha kupitia michezo, kutengeneza zana za kufundishia kwa kutumia rasilimali zilizopo, na kuimarisha ujifunzaji wa watoto wenye mahitaji maalum vile vile mafunzo haya pia yanalenga kuimarisha ushirikiano kati ya walimu, wazazi, na jamii katika kuboresha mazingira ya kujifunzia.