Dodoma FC yaanza ligi daraja la kwanza kwa kishindo

Imewekwa tarehe: September 16th, 2019

Timu ya Dodoma FC inayomilikiwa na Halmashauri ya Jiji la Dodoma, imeanza vyema mikikimikiki ya Ligi Daraja la Kwanza (FDL) kwa kuifunga Cosmopolitan kutoka Dar es salaam mabao 2- 0 katika mchezo uliopigwa Uwanja wa Jamhuri jijini hapa.

Katika mchezo huo uliokuwa mkali na wakusisimua, ilikuwa dakika ya 36 Dodoma FC walipopata bao lao la kwanza kupitia kwa mlinzi wake, Mbwana Kibacha baada ya kuunganisha kwa kichwa mpira wa kona uliopigwa na Hamad Kibopile.

Hadi kipindi cha kwanza kinamalizika Dodoma FCwalikuwa mbele kwa bao hilo 1 - 0. Kipindi cha pili kilianza kwa kila timu kulisakama lango la mpinzani wake, huku Cosmopolitan wakionekana kumiliki sana mpira hasa eneo la katikati lakini ilishindwa kuivuka safu ya ulinzi ya Dodoma FC.

Dodoma FC ilifanikiwa kufunga goli la pili kwa mkwaju wa penati baada ya mshambuliaji wake Jamal Mtegeta kuangushwa kwenye eneo la hatari na mkwaju huo kuwekwa kimiani na kiungo mshambuliaji wa zamani wa Azam FC Hamis Mcha.

Mchezo wa pili wa ligi hiyo, Dodoma FC watakuwa nyumbani tena kucheza dhidi ya timu ya Friends Rangers ya Dar es Salaam katika ligi hiyo, mchezo ambao  utachezwa katika uwanja wa nyumbani wa Dodoma FC uwanja wa Jamhuri jijini Dodoma.