Dodoma Jiji FC yasajili wawili wapya

Imewekwa tarehe: August 15th, 2021

TIMU ya Dodoma Jiji FC inayomilikiwa na Halmashauri ya Jiji la Dodoma imeendelea kujiimarisha kuelekea msimu mpya wa Ligi Kuu ya Tanzania Bara inayotarajiwa kuanza Septemba, 2021 kwa kusajili nyota wapya.

Ukiacha wachezaji ambao wameongezewa mikataba ili kuendelea kuitumikia timu hii ya Makao Makuu, tayari imemsajili mchezaji David Richard Ulomi kwa kandarasi ya mwaka mmoja akitokea timu ya Ruvu Shooting ya Pwani, ambaye ni kiungo mshambuliaji ambapo alimaliza msimu uliopita akifunga magoli 6.

Aidha, Dodoma Jiji FC imekamilisha usajili wa Mohamed Yusuf aliyekuwa kipa namba moja wa timu ya Polisi Tanzania FC ya mkoani Kilimanjaro kwa mkataba wa miaka miwili. 

Kwa mujibu wa Katibu Mkuu wa timu hiyo Johnson Fortunatus ni kwamba zoezi la usajili linaendelea kwa kuzingatia mapendekezo ya kocha mkuu Mbwana Makata ili kuimarisha kikosi hicho kilichofanya vizuri katika msimu uliopita.