Dodoma Jiji watinga robo fainali kombe la FA

Imewekwa tarehe: May 1st, 2021

Timu ya Dodoma Jiji inayomilikiwa na Halmashauri ya Jiji la Dodoma imeionesha KMC tofauti ya Manispaa na Jiji baada ya kutinga hatua ya robo fainali ya michuano ya Shirikisho ya Azam kwa kuichapa timu hiyo ya Manispaa ya Kinondoni (KMC) magoli 2 – 0.

Magoli ya Dodoma Jiji yamefungwa na Seif Abdallah Karihe mnamo dakika ya 18 huku goli la pili likifungwa na Dickson Ambundo aliyepokea pasi kutoka kwa Steven Mganga katika dakika ya 40 ya mchezo huo.

Akizungumzia mchezo huo Kocha Mkuu wa Dodoma Jiji Mbwana Makata amewapongeza wachezaji wake kwa kuonesha soka safi huku akisema siri kubwa ya mafanikio yao ni mazoezi na nidhamu ya hali ya juu kwenye kila timu wanayokutana nayo.

Makata amesema kuwa alijua ubora wa KMC uko wapi na akajiimarisha katika maeneo hayo na kutumia udhaifu wao pia kupata mipenyo na kufanikiwa kuutawala mchezo na kushinda mechi hiyo.

“Hatuna kawaida ya kubeza mchezo au timu yoyote tunayokutana nayo hata kama ni ya ngazi ya Mkoa ndio maana tumekua imara kwenye kila mchezo tunaocheza” alisema Makata.

Aidha ameongeza kuwa kwa sasa wanaangalia watapangwa nani katika hatua inayofuata ya robo fainali huku lengo kubwa ikiwa ni kufika fainali na kuchukua ubingwa wa kombe hili.