Ghana bingwa CANAF 2021

Imewekwa tarehe: December 4th, 2021

TIMU ya Ghana wameibuka mabingwa kwenye  mashindano ya soka barani Afrika kwa  wenye ulemavu (CANAF 2021) baada ya kuishinda Liberia magoli 3-2.

Mchezo wa fainali hiyo umechezwa leo Disemba  4, 2021 kwenye uwanja wa Taifa wa Benjamini Mkapa jijini Dar es Salaam.

Naibu Waziri wa Utamaduni, Sanaa na Michezo. Mhe, Pauline Gekul akiwa na Katibu Mkuu, Dk. Hassan Abbasi na Naibu Katibu Mkuu, Dkt. Ally Possi ameongoza watanzania na wadau wa mchezo huo kutoka mataifa mbalimbali kushuhudia mchezo huo.

Kufuatia ushindi huo Ghana inakuwa bingwa wa mashindano ya CANAF 2021 ikifuatiwa na Liberia, Angola inakuwa mshindi wa tatu na Tanzania wenyeji wamefanikiwa kuwa washindi wa nne.

Timu zote nne ambazo ni washindi zinakuwa zimefuzu kuliwakilisha Bara la Afrika kwenye mashindano ya mchezo huo katika mashindano ya dunia yatakayofanyika nchini Uturuki Oktoba 2022.

Makamu wa Pili wa Rais wa Shirikisho la Soka kwa wenye ulemavu (WAF) Mateus  Wildack ametuma salamu za pongezi kwa Rais wa Jamhuri ya Tanzania Mhe. Samia Suluhu Hassan kwa uongozi mahiri wa kuiletea Tanzania maendeleo na kuwashirikisha walemavu katika michezo.