Halmashauri ya Jiji la Dodoma Yatoa Mafunzo ya Malisho ya Mifugo

Imewekwa tarehe: August 12th, 2025

Na. Rehema Kiyumbi, DODOMA

Afisa Mifugo katika Halmashauri ya Jiji la Dodoma Leonia Msuya ameendelea kutoa elimu kwa wakulima na wafugaji namna ya kulisha na kutunza mifugo yao kwa maendeleo ya kiuchumi.  

Aliyasema hayo wakati akiwa katika vipando vya Halmashauri ya Jiji la Dodoma katika maadhimisho ya kimataifa Nanenane. ’’Tumejiandaa kutoa elimu na kuonesha maonesho ya malisho ambayo ni chakula cha mifugo kwa sababu yamepanuka sana wananchi na wahamiaji wamekuwa wengi ambapo kusababisha malisho kupungua. Kwa mwaka huu tumeandaa vipando vitatu ambavyo ni malisho ya mikunde, nyasi na magugu (sumu) ambapo huchanganywa ili ng’ombe kupata virutubisho ambavyo ni protini, mafuta na wanga kama sisi binadamu,” alisema Msuya. 

Alisema kuwa aina ya malisho ambayo ni sumu huchangia kutoa elimu kwa wakulima na ni moja ya kutunza mazingira. ’’Sumu ni aina ya malisho kama mihogo na nyanya tumefanya makusudi ili mkulima na mfugaji kuweza kuyaondoa kwenye shamba lake. Pia, mkulima na mfugaji wakiandaa mazingira vizuri ya kutengeneza malisho na kuyahifadhi ndani kutumika kwa mwaka mzima au kuandaa shamba ili kuepusha mifugo kuzurura ovyo mitaani kutafuta chakula,” alisema Msuya.

Aliendelea kutoa elimu kuwa watu wengi hawafahamu majani ya mifugo hupandwa. “Watu wengi wamezoea majani ya mifugo hayapandwi, ukweli ni kwamba majani hupandwa na mnyama huweza kula majani makavu ili kumpatia virutubisho vya ziada kama madini kwa sababu baadhi ya majani mabichi hukosa virutubisho. Pia, ni muhimu kwa sababu inamsaidia mfugaji kujua idadi ya mifugo yake inakula malisho kiasi gani kwa siku na kulima majani kiasi gani. Moja ya chakula kizuri kwa nguruwe na kuku ambapo wafugaji wengi hawajui ni Alfa Alfa,” alieleza Msuya.    

Alimaliza kwa kuwashauri wananchi hasa wakulima na wafugaji wa vyakula vya mifugo kwa maendeleo ya jamii. “Tunawakaribisha ili muweza kujifunza namna nzuri ya kuandaa mchanganyo wa malisho na kufahamu majani tofauti tofauti yanayoingiliana kwa mifugo tofauti kama kuku, nguruwe, ng’ombe, bata, sungura, pamoja na vyakula vingine vingi mifugo kupata virutubisho,” alimaliza Msuya.

Mwisho 

Imehaririwa na Samira Geregeza