Jiji Dodoma 'halikamatiki'

Imewekwa tarehe: July 7th, 2019

Halmashauri ya Jiji la Dodoma inakusudia kuanza mradi wa ujenzi wa hotel kubwa yenye hadhi ya nyota nne (4) kwa kutumia mapato ya ndani (Own Source Collection). Jengo hilo ni miongoni mwa vitegauchumi vya Jiji, litakuwa na hotel itakayojulikana kama Dodoma City Hotel.

Jengo hili litakuwa na eneo la mita za mraba 4,486 na litakuwa na maeneo ya huduma za mapokezi, vyumba vya mikutano, vyumba vya hotel (kulala) na migahawa. Hotel hii itakuwa na gorofa 11 zenye jumla ya vyumba 117. Ujenzi wake utafanyika mahali lilipo jengo la "Paradise Cinema" barabara ya Nyerere. Mkataba wa ujenzi unatarajiwa kusainiwa mwezi huu wa Julai 2019.

Jiji la Dodoma limebuni mradi huu katika jitihada zake za kuongeza vyanzo vya mapato ya ndani ili kukuza pato la Halmashauri kwa lengo la kuboresha huduma za elimu, afya, miundombinu na ustawi wa jamii kwa wananchi waishio jijini Dodoma.