Jiji la Dodoma laibuka kinara Maonesho ya Nanenane 2019

Imewekwa tarehe: August 8th, 2019

HALMASHAURI ya Jiji la Dodoma imeibuka mshindi wa kwanza kwa Halmashauri za Mkoa wa Dodoma katika Maonesho ya Nanenane mwaka 2019 na kuzawadiwa cheti na mgeni rasmi katika sherehe za kufunga maonesho hayo zilizofanyika katika viwanja vya Nanenane Nzuguni jijini hapa.

Akikabidhi cheti hicho, mgeni rasmi katika sherehe za kufunga maonesho hayo, Mkuu wa Mkoa wa Singida, Canon Dkt. Rehema Nchimbi alisema kuwa Halmashauri ya Jiji la Dodoma imekuwa mshindi wa kwanza kwa upande wa Halmashauri za Mkoa wa Dodoma. Halmashauri nyingine zilizofanya vizuri ni Halmashauri ya Wilaya ya Kondoa iliyoshika nafasi ya pili na Halmashauri ya Wilaya ya Mpwapwa iliyoshika nafasi ya tatu.

Akiongelea ushindi huo, Afisa Kilimo katika Halmashauri ya Jiji la Dodoma, Agnes Woisso alisema kuwa ushindi huo ulitokana na maandalizi yaliyofanywa na Halmashauri hiyo. “Kulingana na vigezo vilivyowekwa na waandaaji, nadhani tulijitahidi kukidhi vigezo hivyo. Mfano tulikuwa na vipando (bustani) kwa njia mbalimbali, tulitumia viroba, makopo na bustani kichuguu  kama bustani za nyumbani na bustani za kawaida” alisema Woisso.  

Aliongeza kuwa banda la Jiji lilikuwa na wajasiriamali waliokuwa wakielezea kwa ufanisi shughuli zao kulingana na kaulimbiu na Nanenane mwaka huu 2019. Maeneo mengine ya kimkakati ni mabango safi, upambaji wa mabanda safi na sare kwa watoa huduma katika mabanda safi, aliongeza.

Kwa upande wa mifugo, alisema kuwa Halmashauri ilikuwa na ng’ombe wa maziwa wenye viwango bora, kuku wa mayai, sungura na mbuzi, mambo yaliyowavuta watu wengi kwenda kujifunza.

Maonesho ya 26 ya Nanenane yaliyofanyika katika viwanja vya Nanenane Nzuguni Dodoma yalishirikisha makampuni 36, wajasiriamali 300 na taasisi 43 yakiongozwa na kaulimbiu isemayo “Kilimo, mifugo na uvuvi kwa ukuaji wa uchumi wa nchi”.

Mgeni rasmi wa kilele cha Maonesho ya Nanenane Kanda ya Kati 2019 Canon Dkt. Rehema Nchimbi ambaye pia ni Mkuu wa Mkoa wa Singida akiwapungia mikono wananchi na washiriki wa maonesho ya Nanenane kuonesha furaha yake, kulia kwake ni Mkuu wa Mkoa wa Dodoma Dkt. Binilith Mahenge.

Mkuu wa Mkoa wa Singida Canon Dkt. Rehema Nchimbi (aliyeshika cheti) akisamiliana na Kaimu Mkurugenzi wa Jiji la Dodoma Baltazari Ngowi kabla ya kumkabidhi cheti cha ushindi wa kwanza wa Maonesho ya Nanenane kwa Halmashauri za Mkoa wa Dodoma, maonesho haya yalifanyika kwenye viwanja vya Nanenane Nzuguni Dodoma na kufikia kilele chake tarehe 08/08/209.