JPM atunukiwa kwa mchango wake dhidi ya Corona

Imewekwa tarehe: August 14th, 2020

KANISA la Tanzania Assemblies of God (TAG) limemtunuku Rais Dkt. John Magufuli tuzo ya heshima ya kutambua mchango wake katika uongozi imara kwa Taifa na kwa imani kwa Mungu kwa jinsi alivyoliongoza Taifa kwa kumtegemea Mungu katika kipindi kigumu cha janga la ugonjwa wa Covid-19 unaosababishwa na virusi vya Corona.

Tukio hili limefanyika leo kwenye Mkutano Mkuu wa Baraza Kuu la Kanisa la TAG lililojumuisha Maaskofu na Wachungaji takribani 4,000 wa Kanisa hilo wa nchi nzima waliokutana katika ukumbi wa Chuo cha Biblia Miyuji Jijini Dodoma.

"Imetunukiwa kwa Mhe. Dkt. John Pombe Magufuli, Rais wa Jamhuri ya Muungano wa Tanzania, katika kutambua ufanisi katika kuliongoza Taifa na imani kwa Mungu katika kudhibiti mlipuko wa Corona nchini Tanzania mwaka 2020 kutoka kwa Baraza Kuu la Tanzania Assemblies of God" maneno alioyasema Askofu Mkuu Mtokambali akirejea maneno yaliyoandikwa kwenye tuzo hiyo.

Aidha, wakati akitoa shukrani zake kwa kupewa tuzo hiyo Rais Magufuli amewataka viongozi wa dini nchini kuwa mstari wa mbele katika kuliombea taifa kuelekea Uchaguzi Mkuu wa mwaka 2020 na amewaomba Watanzania kuacha kujihusisha na vitendo vya uvunjifu wa amani na wanasiasa wafanye siasa za kistaarabu.

Vilevile, Mheshimiwa Rais amelipongeza Kanisa hilo kwa huduma nzuri ya kiroho linayoitoa kwa waumini wake na kwa mchango wake katika utoaji wa huduma za kijamii kwa Watanzania bila ubaguzi. Mhe. Dkt. Magufuli ameahidi kuwa Serikali itaendelea kulinda uhuru wa kuabudu ambao upo kwa mujibu wa katiba.

Kabla ya kukabidhi tuzo hiyo, Askofu Mkuu Mtokambali ameiomba Serikali kuhakikisha Uchaguzi Mkuu ujao unakuwa huru na wa haki kama iliyokuwa huru na wazi michakato ya kuwapata wagombea wa vyama mbalimbali katika nafasi za uongozi kwenye vyama vyao.

Rais wa Jamhuri ya Muungano wa Tanzania Mhe. Dkt. John Magufuli akiwa ameinua tuzo ya kutambua mchango wake wakati wa mapambano dhidi ya ugonjwa wa Covid-19 unaosababishwa na virusi vya Corona, mbele yake ni Askofu Mkuu wa Kanisa la TAG Barnabas Mtokambali.