Makamu wa Rais kuzindua Makao ya Taifa ya Watoto Jijini Dodoma leo

Imewekwa tarehe: June 16th, 2021

WAKATI Afrika ikiadhimisha Siku ya Mtoto Afrika, Makamu wa Rais wa Jamhuri ya Muungano wa Tanzania Mhe. Dkt. Philip  Mpango leo Juni 16, 2021 atazindua Makao ya Taifa  ya Watoto katika Kata ya Kikombo Jijini Dodoma yanayolenga kuwahudumia watoto walio katika mazingira magumu. 

Makao hayo yenye uwezo wa kuhudumia watoto 250 kwa wakati mmoja yamejengwa kwa Ushirikiano kati ya Serikali ya Tanzania na Mfuko wa Abbott.

Mwaka huu kaulimbiu ya Siku ya Mtoto wa Afrika inasema, “Tutekeleze ajenda 2040: kwa Afrika inayolinda haki za mtoto”

Siku chimbuko lake ni kumbukumbu ya watoto zaidi 2000 waliuawa wakati wakiandamana kupinga ubaguzi wa rangi katika mfumo wa elimu nchini Afrika Kusini mnamo mwaka 1976. 

Maadhimisho hayo kwa hapa nchini Tanzania yanafanyika katika ngazi ya Halmashauri ili kuwawezesha wananchi kwa wingi wao kushiriki.