Serikali yajizatiti kuendeleza kilimo cha zao la zabibu

Imewekwa tarehe: August 13th, 2021

WAZIRI Mkuu Kassim Majaliwa amesema Serikali ya awamu ya sita inayoongozwa na Rais Mhe. Samia Suluhu Hassan imedhamiria kuendeleza kilimo cha zao la zabibu na kuhakikisha linaleta tija kwa wakulima.

Ameyasema hayo Ijumaa Agosti 13, 2021 alipotembelea mashamba ya zabibu ya Chinangali na Bihawana akiwa katika muendelezo wa ziara zake za kukagua maendeleo ya zao hilo.

Aidha, Waziri Mkuu amewashauri wakulima watenge sehemu ya mashamba yao na kulima zabibu za mezani ambazo nazo zina faida kubwa badala ya kulima za kuzalisha mvinyo tu.

Pia Waziri Mkuu amemuagiza Mkurugenzi wa Jiji la Dodoma, Bw. Joseph Mafuru ahakikishe anaandaa utaratibu wa kusasaidia wakulima wa zabibu wa Bihawana kwa kuwawekea mfumo wa umwagiliaji.

Waziri Mkuu amesema zabibu zinazopatikana mkoani Dodoma zina thamani kubwa na ni nzuri kwa utengenezaji wa mvinyo ukiliganisha na zabibu zinalizomwa katika maeneo mengine.

Amesema kilimo hicho kinwamuwezesha mwananchi kuboresha uchumi wake, hivyo amewashauri wakazi wa mkoa wa Dodoma wakiwemo watumishi wa umma wachangamkie fursa hiyo.

Waziri Mkuu ametumia fursa hiyo kuwahakikishia wakulima wa zabibu kwamba Serikali imedhamiria kuboresha kilimo cha zao hilo kwa sababu kilimo ni mkombozi kwa Watanzania.

Wakulima wasaidiwe kuanzia hatua za awali za uandaaji wa mashamba, upatikanaji wa mbegu, pembejeo hadi hatua ya utafutaji wa masoko.

Kwa upande wake, Naibu Waziri wa Kilimo, Hussein Bashe amesema wizara hiyo ipo katika mkakati wa kufufua shamba la zabibu la Chinangali na tayari wameanza na ukarabatti wa mfumo wa maji.

Amesema wamefanikiwa kufufua visima vitatu ambavyo vinapeleka maji katika bwawa la umwagiliaji na kwamba wanatarajia kuweka upya mfumo wa umwagiliaji katika shamba lote.

Waziri huyo amesema hatua hiyo inatokana na kuharibika kwa mfumo wa awali wa umwagiliaji uliokuwa umefungwa kwenye shamba hilo. Shamba la Chinangali lina ukubwa wa ekari 600 na kati ya hizo, ekari 300 ndizo zimeendelezwa.

Pia, Waziri huyo amesema mbali na kufunga upya mfumo wa umwagiliaji, pia wameweka lengo la kuzalisha miche 500,000 kwa ajili ya kupanda upya shamba hilo.

“Kituo cha TARI Makutupora kimeotesha miche mingi ya zabibu za mezani ambayo itagawiwa kwa wakulima ili waweze kupanda kuzalisha aina hiyo ya zabibu kwa wingi” alisema Bashe.

Waziri Mkuu Kassim Majaliwa akiangalia zao la zabibu shambani.

Chanzo: Ukurasa wa Instagram wa Ofisi ya Waziri Mkuu (owm_tz)