Mratibu wa CHF iliyoboreshwa Mkoa ataja mikakati kuwafikia wananchi

Imewekwa tarehe: May 22nd, 2020

Mikakati ya kufikisha elimu juu ya Mfuko wa Afya ya Jamii (CHF iliyoboreshwa) kwa wananchi imetajwa na kuwekwa wazi kwa wananchi wote wa mkoa wa Dodoma.

Hayo yalisemwa na Mratibu wa Mfuko wa Afya ya Jamii wa Mkoa wa Dodoma Daktari Francis Lutalala alipokuwa akizungumza wiki iliyopita mbele ya waandishi wa habari mara baada ya Mkuu wa Mkoa wa Dodoma Dkt. Binilith Mahenge kuzindua kampeni ya Uhamasishaji wa CHF iliyoboreshwa kwa kipindi cha mwezi Mei hadi Agosti 2020.

Dkt. Lutalala alisema kuwa katika kipindi hiki cha mavuno mkoani Dodoma, kutakuwa na kampeni maalum kuhamasisha wananchi kujiunga na Mfuko wa Afya ya Jamii (CHF iliyoboreshwa) tukiamini kuwa baada ya wakulima kupata mvua ya kutosha na mavuno kuwa mazuri, basi itakuwa rahisi wananchi kulipia gharama ya shilingi 30,000 (elfu thelathini) tu kwa kaya yenye watu sita.

Mikakati itakayotumika kuwafikia wananchi ni pamoja na kutumia vyombo vya habari kama redio, mitandao ya kijamii (instagram, facebook, whatspp, tovuti, blog), magazeti na kadharika kwa lengo la kufikisha elimu ihusuyo wananchi kujiunga na CHF iliboreshwa.

Aidha, watashirikishwa viongozi wa dini ambapo elimu itatolewa kwenye nyumba za ibada na baada ya ibada wananchi watapata nafasi ya kujiandikisha. "Tunashukuru kwa kuwa tayari viongozi wa dini mbalimbali wametuahidi kutupa ushirikiano kufanikisha zoezi hili," alisema Dkt. Lutalala.

Akielezea zaidi Mratibu huyo alisema kuwa mkakati mwingine ni kufika kwenye maeneo ya mikusanyiko wa watu kwenye huduma za kijamii kama vile masoko, stendi, minada na kadharika.

Akifafanua zaidi Dkt. Lutalala alibainisha kuwa, "Vile vile tutafika vijijini na kupita nyumba kwa nyumba ambapo maafisa waandikishaji watakuwa wakitoa elimu pamoja na kuandikisha au kuwasajili wanachama".

Vile viel kutakuwepo na magari ya matangazo yatakayopita mitaani kutoa elimu ya CHF iliyoboreshwa sambamba na elimu dhidi ya maambukizi ya virusi vya Corona.