Rais JPM aongoza waombolezaji ibada ya kuaga mwili wa Jaji Nsekela

Imewekwa tarehe: December 8th, 2020

MAPEMA leo asubuhi, Mhe. Rais John Pombe Magufuli amewaongoza wananchi wa Dodoma kutoa heshima za mwisho kwa mwili wa Marehemu Jaji Mstaafu wa Mahakama ya Rufani, Harold Nsekela aliyekuwa Kamishna wa Maadili ya Viongozi wa Umma ambaye amefariki dunia tarehe 06 Disemba, 2020, ibada hiyo imefanyika katika Bustani ya Kupumzikia ya Chinangali (Chinangali Park) iliyopo Jijini Dodoma.

Ibada ya kumuaga Jaji Mstaafu Harold Nsekela iliongozwa na Askofu Manase Damiani Martin wa kanisa la Elim New Covenant Church.

Viongozi wengine waliotoa heshima za mwisho ni pamoja na Makamu wa Rais Mhe. Samia Suluhu Hassan, Waziri Mkuu Mhe. Kassim Majaliwa Majaliwa, Jaji Mkuu wa Tanzania Mhe. Prof. Ibrahim Hamis Juma, Spika wa Bunge Mhe. Job Yustino Ndugai, Naibu Spika Dkt. Tulia Ackson, Katibu Mkuu Kiongozi Mhe. Balozi John Kijazi na Familia ya marehemu akiwemo mkew wa marehemu, mama Subilaga Nsekela, wanae, ndugu, jamaa na marafiki.

Aidha, watumishi wa Sekretarieti ya Maadili ya Viongozi wa Umma, watumishi wa Halmashauri ya Jiji la Dodoma, watumishi wa taasisi mbalimbali za Serikali na binafsi na wananchi walipata nafasi ya kupita mbele ya mwili wa Jaji Mstaafu Nsekela na kutoa heshima zao za mwisho kwa nguli huyo wa sheria nchini.