Rais Samia atoa wito Burundi iondolewe vikwazo vya kiuchumi

Imewekwa tarehe: May 5th, 2021

RAIS wa Jamhuri ya Muungano wa Tanzania, Mhe. Samia Suluhu Hassan leo tarehe 05 Mei, 2021 amekutana na kufanya mazungumzo na Mjumbe Maalum wa Katibu Mkuu wa Umoja wa Mataifa katika Ukanda wa Maziwa Makuu Mhe. Balozi Xia Huang Jijini Nairobi.

Katika mazungumzo hayo Mhe. Balozi Huang amewasilisha salamu za pole za Katibu Mkuu wa Umoja wa Mataifa Mhe. Antonio Guterres kwa Mhe. Rais Samia kufuatia kifo cha aliyekuwa Rais wa Jamhuri ya Muungano wa Tanzania Hayati Dkt. John Pombe Magufuli na pongezi kwa Mhe. Rais Samia kupokea kijiti cha Urais akiwa mwanamke wa kwanza kuwa Rais wa Tanzania.

Mhe. Balozi Huang amesema Umoja wa Mataifa wanayo matumaini makubwa na uongozi wa Mhe. Rais Samia katika kuiongoza Tanzania na kuendeleza ajenda za ukanda wa Maziwa Makuu ambazo ni kukuza maendeleo ya kijamii na kiuchumi na pia kuendeleza juhudi za kulinda amani na kuimarisha usalama.

Ameipongeza Tanzania kwa mchango na ushirikiano mkubwa inaoutoa kwa Umoja wa Mataifa katika juhudi za kulinda amani na kuimarisha usalama katika maeneo yote yenye mapigano na makundi yanayohasimiana na ameahidi kuwa umoja huo utaendelea kushirikiana na Tanzania kulinda amani ili maendeleo ya jamii na uchumi yastawi.

Kwa upande wake, Mhe. Rais Samia amepokea salama za pole na pongezi kutoka kwa Katibu Mkuu wa Umoja wa Mataifa Mhe. Guterres na amemhakikishia kuwa Serikali itaendelea kushirikiana na umoja huo katika juhudi za kulinda amani na usalama katika ukanda wa Maziwa Makuu.

Mhe. Samia amesema hali ya ulinzi na usalama na demokrasia nchini Tanzania ni nzuri na ameomba Umoja wa Mataifa kuendeleza jitihada za kulinda amani na usalama katika maeneo yote yenye matatizo.

Aidha, Rais Samia ametoa wito kwa umoja huo kuushawishi Umoja wa Ulaya (EU) kuondoa vikwazo vya kiuchumi dhidi ya Burundi.