Simba na Dodoma Jiji kesho, mechi ya mabingwa

Imewekwa tarehe: April 26th, 2021

AFISA Habari wa Timu ya Dodoma Jiji FC, Moses Mpunga leo amefanya mahojiano na kituo cha Redio cha Wasafi FM kupitia kipindi cha michezo cha Sports Arena kuelekea mtanange wa kukata na shoka kati ya wenyeji Simba ya Jijini Dar es Salaam na timu ya Makao Makuu ya Nchi Dodoma Jiji FC, mchezo utakaopigwa kesho katika dimba la Benjamin Mkapa.

Mtangazaji maarufu Maulidi Kitenge licha ya kusifia mchezo mzuri unaoonyeshwa, alimuuliza Mpunga kutaka kujua Dodoma Jiji wanauonaje mchezo wao na Simba na nini kinachowafanya wajiamini kuelekea mchezo huo hapo kesho.

“Mechi ya kesho ni mechi ya mabingwa, Dodoma Jiji ni mabingwa wa Ligi Daraja la kwanza na Simba ni mabingwa wa Ligi Kuu msimu uliopita.

Wana ‘gold medal’ na sisi tuna ‘gold medal’, kocha wao alikuwa kocha bora na sisi wa kwetu alikuwa kocha bora, wana mfungaji bora na sisi tuna mfungaji bora kama utaangalia ligi tulizocheza msimu uliopita, timu zote mbili zilikuwa mabingwa.

Kwa hiyo itakuwa mechi ya mabingwa, na itakuwa mechi nzuri. Watu wajitokeze kwa wingi hasa wapenzi na mashabiki wetu kutoka Dodoma na maeneo mengine, tunakwenda kuwashangaza Watanzania. Sisi huwa hatufungwi mara mbili” amejinasibu Ofisa Habari wa Dodoma Jiji FC.

Aidha, akifafanua zaidi Mpunga alisema kuwa Dodoma Jiji FC wanajiamini na hawajichukulii kama timu ndogo ambayo imepanda Ligi Kuu bali wanajiona kuwa ni moja ya timu bora inayotafuta nafasi nzuri kwenye msimamo wa ligi kuu, pili alisema kuwa wana kocha bora na wachezaji wenye uzoefu ambao wanatambua wajibu wao na kusisitiza kuwa timu ina menejimenti ambayo inafanya kazi kwa weledi mkubwa katika kutimiza majukumu yake ya kiuongozi.