TRC yatoa taarifa rasmi ajali ya treni

Imewekwa tarehe: January 3rd, 2021

SHIRIKA la Reli Tanzania (TRC) limetangaza kutokea kwa ajali ya treni maeneo ya Kigwe - Bahi umbali wa kilometa 58 kutokea Dodoma mjini. Treni hiyo ilikuwa imetokea jijini Dar es Salaam ikielekea mikoa ya Tabora, Katavi (Mpanda), Kigoma na Mwanza ikiwa na abiria 720.

Treni hiyo ilikuwa na behewa 12 na kati ya hizo, behewa sita ndizo zilizopata ajali. 

Katika taarifa yake Shirika hilo limebainisha kuwa kumekuwa na majeruhi 66 na watu watatu wamefariki dunia.

Majeruhi wa ajali hiyo wanaendelea kupata matibabu katika hospitali ya Bahi na hospitali ya Rufaa ya mkoa wa Dodoma (General Hospital) jijini Dodoma.

Aidha, uchunguzi wa chanzo cha ajli hiyo unaendelea na Shirika limeahidi kuendelea kutoa taarifa zaidi.

Picha kwa hisani ya Millardayo