Tuzo ya Mavunde, mshindi kuvuna 20m

Imewekwa tarehe: June 1st, 2023

MBUNGE wa Jimbo la Dodoma Mjini Mh. Anthony Mavunde ameanzisha Tuzo maalum ya Wajasiriamali ambayo italenga katika kuongeza wigo wa uchakataji bidhaa  za kilimo na mifugo kwa kukipatia mitambo na mashine ndogo zenye thamani ya Shilingi 20,000,000 kikundi  kimoja kitakachopitishwa na Shirika la Viwanda Vidogo (SIDO) kila mwaka.

Mavunde ameyasema hayo jana tarehe 30.05.2023 katika Viwanja vya Nyerere Square wakati akifunga mafunzo ya wajasiriamali mkoani Dodoma chini ya mwavuli wa Taasisi ya Wanawake na Uchumi wa Viwanda(WAUVI).

“Ninawapongeza sana WAUVI kwa mafunzo hayo yenye lengo la kuwajengea uwezo wajasiriamali wa Dodoma ili kuongeza thamani ya bidhaa wanazozalisha.

Ninaona jitihada kubwa sana za Wajasiriamali hapa Jijini Dodoma ambao naamini tukiwasaidia kwa kuwaongezea mtaji na mashine za kisasa wanaweza kupiga hatua na kuleta mapinduzi makubwa.

Tunamshukuru Mh Rais Dr. Samia S. Hassan kwa kuendelea kutengeneza fursa nyingi zaidi za kiuchumi kupitia uwekezaji mkubwa unaoendelea wa kuijenga Makao Makuu Dodoma.

Mimi kwa nafasi yangu nitahakikisha tunawasaidia wajasiriamali ambao wameshapiga hatua  na kuhitaji mitambo na mashine ndogo kukua zaidi kiuchumi.

Nitaanzisha TUZO YA MAVUNDE YA WAJASIRIAMALI ambayo lengo lake kubwa litakuwa ni kupata kikundi cha kuongeza thamani ya mazao na mifugo ambacho tutakipa mitambo na mashine ya Shilingi 20,000,000 na kukilea mpaka kukua kwake”. Alisema Mavunde.

Akitoa maelezo ya awali Mwenyekiti wa WAUVI TAIFA Bi. Rehema Mbeleke amesema mafunzo hayo kwa wajasiriamali 3,000 yana lengo ya kuwajengea uwezo wajasiriamali wa Dodoma ili kushiriki katika masoko ya ushindani wa bidhaa.