Uongozi Kata ya Chamwino waipongeza 'Club' ya Mazingira

Imewekwa tarehe: July 1st, 2023

AFISA Mtendaji wa Kata ya Chamwino Lucas Venance ameishukuru Kilabu ya Mazingira iliyo chini kituo cha vipaji cha Shell Sports Centre kwa kuunga mkono na kushiriki pamoja na Ofisi ya Mtendaji wa Kata na wananchi wa Kata ya Chamwino katika zoezi la usafi ambao hufanyika kila siku ya Jumamosi.

Shukurani hizo zimetolewa leo tarehe 01 Julai, 2023 wakati wa kuhitimisha zoezi la usafi wa mazingira na Afisa Mtendaji kuongea na wananchi wa Kata ya Chamwino Jijini Dodoma walioshiriki kufanya usafi.

Zoezi hilo la usafi limefanyika katika mitaa yote minne ya Kata ya Chamwino ambayo ni Nduka, Mailimbili, Sokoine na Mwaja ambapo kulifanyika usafi kwenye maeneo ya mitaro, biashara, makazi na shule. Shughuli zilizofanyika ilikuwa ni pamoja na kufyeka nyasi, kuondoa vichaka vilivyopembezoni mwa mitaro na kutoa taka ngumu kama makopo na mifuko hususani kwenye mitaro na pembeni ya barabara.

 Kituo cha Shell Sports Centre kipo chini ya uongozi na ulezi wa ndugu Abdallah Mohamed tangu kuanzishwa kwake mwaka 2022 ambapo kikundi hicho kimejikita kuwajengea vijana wadogo moyo wa kushiriki mambo ya kijamii ikiwamo kudumisha usafi wa mazingira.

Miongoni mwa maeneo yaliyofanyiwa usafi wa mazingira na kilabu ya Shell Sports Centre katika kata ya Chamwino Jijini Dodoma ikiwa katika hali nadhifu, safi na ya kupendeza.