Upandishaji hadhi barabara uzingatie sheria - Silinde

Imewekwa tarehe: September 20th, 2022

Asila Twaha, TAMISEMI

Naibu Waziri Ofisi ya Rais, Tawala za Mikoa na Serikali za Mtaa (Elimu) Mhe. David Silinde (pichani juu) ameagiza kufuatwa kwa sheria za barabarani pale barabara zinapofikia kupandishwa hadhi na kuwa barabara za Mikoa.

Mhe. Silinde ameyasema hayo leo Septemba 20, 2022 Jijini Dodoma, wakati akijibu swali la Mbunge wa Tunduru Kusini Mhe. Daimu Mpakate aliyetaka kujua Serikali inampango gani wa kupandisha hadhi barabara ya Tunduru-Masakata hadi Nenjela kuwa ya Mkoa.

Aidha, amefafanua kuwa, vigezo na taratibu za upandishwaji wa hadhi barabara kuwa za Mikoa au kuteremsha hadhi barabara kutoka daraja moja hadi jingine ni lazima uzingatie  Sheria ya barabara namba 13 mwaka 2007 na Kanuni zake ya mwaka 2009.

Vilevile, ameielekeza Halmashauri ya Wilaya ya Tunduru kushirikiana na Wakala wa Barabara Mjini na Vijijini (TARURA) kuiangalia barabara hiyo kama imezingatia Sheria, Taratibu na Kanuni za upandishwaji barabara.

Ametoa wito kwa Waheshimiwa Wabunge kushirikiana na Serikali ili kuhakikisha maendeleo ya miradi ya barabara, elimu na afya yanaonekana lengo likiwa ni upatikanaji wa huduma bora kwa wananchi.

Mhe. Silinde amewaeleza Waheshimiwa Wabunge pamoja na kuwa upandishaji hadhi wa barabara za Mikoa unafanyika chini ya Wizara ya Ujenzi Serikali inafanya kazi kwa kushirikiana na itahakikisha barabara hizo zinafanyiwa kazi ili kurahisisha usafirishaji wa bidhaa na wananchi.