Wakuu wa Wilaya Mkoaa wa Dodoma wakabidhiwa magari

Imewekwa tarehe: July 18th, 2024

MKUU wa Mkoa wa Dodoma Mhe. Rosemary Senyamule amefanya hafla fupi ya kukabidhi Magari kwa Wakuu wa Wilaya za Chemba, Kondoa na Mpwapwa leo Julai 18, 2024 hafla iliyofanyika katika Ofisi yake iliyopo Jengo la Mkapa Jijini Dodoma.

Mhe. Senyamule amesema, Mkoa unaendelea kuona namna Mikakati ya Nchi inavyotekelezwa ikiwa ni pamoja na kutatua kero za wananchi na ndio sababu kuu ya ugawaji wa vitendea kazi hivyo kwa Wakuu wa Wilaya ambao hawakua navyo ili kuendeleza kazi za Serikali na kuwafikia wananchi kwa ukaribu zaidi.

“Ni hali isiyo ya kawaida na ya kipekee kuona Mkoa unapata magari zaidi ya moja ili kurahisisha kazi ya kuifikia Miradi na kuwatembelea wananchi ili kutatua kero na changamoto zao kama azma ya Mkoa inavyosema “kero yako wajibu wangu” hivyo nendeni mkaitekeleze azma hiyo kwa kuwafikia wananchi na kusimamia miradi kwa ubora.

“Baada ya kupata magari haya Sasa nina imani miradi itaisha kwa wakati na ubora uliotarajiwa. Ni matamanio ya Rais mufike kila kijiji, Kitongoji na Kata kwenda kuongea na wananchi na kutatua kero zao na zaidi kusema kazi nzuri anayofaifanya. Tunafahamu matumizi ya usafiri huu yana taratibu na miongozo yake na kufuata matumizi kama ilivyoelekezwa hivyo magari haya yatumike kwa ajili ya kazi iliyokusudiwa” Amesema Mhe. Senyamule.

Kwa upande wake, Katibu Tawala Mkoa wa Dodoma Bw. Kaspar K.Mmuya amesema madereva wote waliokabidhiwa magari hayo, wayatunze na kuandika mwenendo wake ikiwa ni pamoja na matumizi yake ambayo ni kwa ajili ya Serikali na si vinginevyo.

Vile vile, Mkuu wa Wilaya ya Mpwapwa Mhe. Sophia Kizigo kwa niaba ya wakuu wa Wilaya hao, amesema usafiri huo utawawezesha katika kazi zao za kutembelea miradi na kusikiliza kero. Hivyo kama Kiongozi atahakikisha magari hayo yatarudi yakiwa kwenye hali nzuri kama walivyoyapokea.