'Walima Zabibu' waanza kuwanolea makali KMC

Imewekwa tarehe: June 2nd, 2021

KIKOSI cha wakali wa Makao Makuu ya Nchi, 'Walima Zabibu', Dodoma Jiji Football Club kimeanza mazoezi rasmi baada ya kuwa mapumzikoni kwa siku tano.

Kikosi hicho kimerejea kambini jana tarehe 01/06/2021 baada ya uongozi kutoa mapumziko ya siku 5 kuanzia tarehe 26/05/2021 ili kutoa nafasi kwa wachezaji kupumzika kwa muda baada ya kuwa na michezo mfululizo ya ugenini.

Walima zabibu hao wameanza mazoezi kujiandaa na mchezo wao wa Ligi Kuu ya Tanzania Bara dhidi ya KMC siku ya tarehe 17/06/2021 saa 10:00 jioni katika dimba la Jamhuri Jijini hapa.

Dodoma Jiji inakutana na “Kino Boys” kwa mara ya tatu ambapo timu zote zimeshinda mchezo mmoja mmoja katika michezo miwilli ya awali waliyokutana, hivyo mchezo huo unatarajiwa kuwa mgumu kutokana na nafasi za timu hizo katika msimamo wa ligi kuu.

Timu hiyo ya Makao Makuu imeshacheza michezo 30 ikiwa imebakiza michezo minne dhidi ya KMC (nyumbani), Gwambina (ugenini), Mtibwa na Yanga ambazo zote zitacheza na Dodoma Jiji ikiwa nyumbani.

Mpaka sasa Dodoma Jiji imejikusanyia alama 39 ikiwa katika nafasi ya tisa ambapo inahitaji kushinda michezo yote minne iliyobaki ili kujihakikishia kumaliza msimu ikiwa kwenye nafasi nne za juu ambapo miongoni mwa malengo yao ni kushiriki michuano ya kimataifa hapo baadae.