WanaDodoma watakiwa kuiunga mkono timu ya Dodoma Jiji FC

Imewekwa tarehe: December 2nd, 2021

MKUU wa Wilaya ya Dodoma, Mhe Jabiri Shekimweli amewataka wananchi na wadau wa michezo Jijini Dodoma kuiunga mkono kwa hali na mali timu ya Dodoma Jiji Footbal Club inayomilikiwa na Halmashauri ya Jiji la Dodoma.

Mheshimiwa Shekimweli ameyasema hayo leo alasiri wakati akipokea basi jipya litakalokuwa likitumiwa na timu ya Dodoma Jiji FC, hafla iliyofanyika katika uwanja wa Jamhuri, ambapo Mkuu huyo wa Wilaya ametoa rai kwa wanaDodoma kuwa mstari wa mbele kuipigania timu hiyo ambayo hadi sasa kwenye msimamo wa ligi ya NBC ipo katika nafasi ya tatu nyuma ya vinara wa ligi hiyo wakongwe Yanga na Simba za Jijini Dar es Salaam. 

"Timu hii ndiyo utambulisho wetu, kila mwana Dodoma lazima ajivunie uwepo wake na hivyo kuisaidia timu yetu iendelee kufanya vizuri.

Tuna timu bora, nzuri na tishio ambayo Dodoma tukiendelea kuiunga mkono itafika mbali na kufanya vizuri katika michuano ya ligi kuu ya NBC." alimesema Shekimweli.

Naye Mbunge wa Jimbo la Dodoma Mjini Mhe. Anthony Mavunde wakati akimkaribisha mgeni rasmi amewashukuru watu wote walioshiriki kwenye mchakato wa upatikanaji wa basi hilo jipya la timu na kuahidi kuendelea kutafuta wadau wengi zaidi wa Dodoma na hata nje ya Dodoma ili kuisaidia timu, aliongeza kuwa hivi sasa wapo kwenye mazungumzo na kampuni mbili kubwa moja ya maji na ingine ya vifaa vya ujenzi ili kuona kama wanaweza kupata ufadhili kutoka kwao.

Akishukuru kwa niaba ya wachezaji, nahodha wa timu Mbwana Kibacha amewashukuru viongozi wa timu na wadau wengine kwa kutimiza ahadi yao ya kuwatafutia usafiri mzuri na ameahidi kwa niaba ya wachezaji kwamba watajitahidi kuhakikisha wanafanya vizuri katika michezo inayofuata ili kuendelea kulinda heshima ya Dodoma.

Mgeni rasmi Mkuu wa Wilaya ya Dodoma, Mhe. Jabiri Shekimweli akikata utepe katika hafla ya mapokezi ya basi jipya la timu ya Dodoma Jiji FC. Kushoto ni Mstahiki Meya wa Jiji, Prof. Davis Mwamfupe, wa nne kutoka kushoto ni Mbunge wa Dodoma mjini Mhe. Anthony Mavunde pamoja na vviongozi wengine mbalimbali waliohudhuria hafla hiyo.