Wananchi wa Pangani wamshukuru Rais Magufuli

Imewekwa tarehe: September 19th, 2019

Wananchi wa Wilaya ya Pangani wamemshukuru Rais Dkt. John Pombe Magufuli kwa kuwajengea vituo viwili vya afya pamoja na uimarishaji wa miundombinu ya elimu.

Shukurani hizo zilitolewa wakati wa ziara ya Waziri wa Nchi Ofisi ya Rais Mhe. Selemani Jafo alipofanya ziara ya kikazi wilayani humo.

Jafo alifanya ziara ya kikazi wilayani Pangani ambapo alikagua ujenzi wa kituo cha afya Mkaramo, ujenzi wa madarasa，bweni na bwalo la sekondari ya Mwera, pamoja na ujenzi wa jengo la utawala la Halmashauri ya Wilaya ya Pangani.

Katika ziara hiyo Jafo alionyesha kuridhishwa na mahusiano mazuri ya viongozi wa Pangani ambapo aliwataka viongozi wengine kuiga mfano wa Pangani kwa maslahi mapana ya Wilaya zao kwani kuna wilaya zingine viongozi wameendekeza migogoro baina yao hivyo kuzorotesha maendeleo ya wananchi.

Mheshimiwa Jafo yuko ziarani Mkoani Tanga kukagua miradi mbalimbali ya maendeleo katika Halmashauri za Mkoa huo.