Waziri Mkenda awaita wawekezaji Hoteli Dodoma

Imewekwa tarehe: May 11th, 2021

SERIKALI amewaasa wawekezaji wa ndani na nje ya nchi kuja kuwekeza katika sekta ya Hoteli Jijini Dodoma kutokana na fursa zilizopo zinazoendana na kukua kwa Jiji hilo.

Ameyasema hayo Mei 8, 2021 na Waziri wa Kilimo Mhe. Prof. Adolf Mkenda, wakati akizundua hoteli ya Rafiki Dodoma Hotel yenye hadhi ya nyota nne iliyojengwa na muwekezaji mzawa Bw. Fladmiry Mallya kutoka Rombo mkoani Kilimanjaro.

Waziri Mkenda amesema kuwa wawekezaji wanahitaji katika jiji la Dodoma kutokana na uwepo wa shughuli nyingi za kiserikali na kitaifa ambazo zinahitaji uwekezaji katika huduma mbalimbali.

Akizungumzia uzinduzi wa Hoteli hiyo Prof. Mkenda amesema kuwa itasaidia kupunguza changamoto ya nyumba za kulala wageni zenye hadhi ambazo zinahitajika hivi sasa kwa wingi jijini Dodoma.

“Kupatikana kwa hoteli hii katika jiji la Dodoma itatusaidia kuondoa usumbufu uliokuwepo hapo awali hasa wakati wa mikutano mikubwa ambayo wageni walikuwa wanapata shida kupata sehemu ya za kulala zenye hadhi” amesema Prof. Mkenda.

Aidha, Prof. Mkenda amesema kuwa wawekezaji wote ambao wanataka kuja kuweza katika jiji la Dodoma milango ipo wazi kwani serikali itasaidia kufanikisha uwekezaji wao ili kusaidia kutoa ajira kwa makundi mbalimbali.

Pia amesema kuwa kwa sasa serikali imeweka mazingira wezeshi kwa mtu yeyote ambaye atahitaji kuja kuweza katika sekta mbalimbali.

Kwa upande wake Mbunge wa Dodoma, Antony Mavunde amesema kuwa jiji la Dodoma limejipanga kuhudumia wawekezaji ambao wataonyesha nia ya kuwekeza katika sekta mbalimbali.

Mhe. Mavunde amesema kuwa hivi sasa kupitia baraza la madiwani wa Halmashauri ya Jiji la Dodoma, wameweka mikakati ya kuhudumia wawekezaji kwa muda mfupi na kuwapatia maeneo ya uwekezaji bila urasimu.

“Moja ya faida ya uwekezaji kama huu hapa jijini Dodoma ni kubadili muonekanao wa jiji letu lakini pia uwepo wa hoteli kubwa kama hivi kunasaidia kuondoa uhaba wa nyumba za kulala wageni hasa wakati ule tunapokuwa na mikutano mikubwa.

Naye Mkurugenzi wa Hoteli hiyo, Fladimiry Mallya, amesema kuwa anategemea kupata wageni wengi kutokana na huduma bora wanazotoa katika Hoteli hiyo ya kisasa katika Jiji la Dodoma.

Hata hivyo, ametoa wito kwa  serikali kuwashika mkono wawekezaji katika kuwasaidia kukabiliana na kero mbalimbali ambazo wamekuwa wakikumbana nazo.