Waziri Mkuu asimamisha likizo, madarasa yakamilike

Imewekwa tarehe: December 7th, 2020

Waziri Mkuu Kassim Majaliwa amewaagiza Makatibu Tawala wa Mikoa yote nchini wahakikishe kuwa watendaji wote wa Mikoa, Wilaya, Halmashauri wasiende likizo ya sikukuu ya Krismas na mwaka mpya kwa mwaka huu, badala yake wakasimamie ukamilishaji wa ujenzi wa vyumba vya madarasa na madawati na wawe wamekamilisha ifikapo mwezi Februari 28, 2020.

“Suala hili nitalifuatilia mwenyewe ili kuhakikisha wanafunzi wote waliochaguliwa chagua la kwanza na la pili wawe wameingia madarasani kufikia Machi mosi mwaka 2021. Ukamilishaji wa vyumba hivyo Pamoja na madawati ufanyike kwa kutumia vyanzo vyenu vya ndani vya fedha”

Waziri Mkuu ametoa agizo hilo leo Jumatatu Disemba 7, 2020 alipokuwa akizungumza na Wakuu wa Mikoa, Katibu Mkuu Wizara ya Elimu, Sayansi na Teknolojia, Katibu Mkuu Ofisi ya Rais-TAMISEMI. Kikao hicho ambacho Waziri Mkuu alikiongoza kwa njia ya televisheni akiwa ofisini kwake Mlimwa jijini Dodoma kilihusu upokeaji wa taarifa ya maandalizi ya kupokea wanafunzi wa kidato cha kwanza 2021.

Waziri Mkuu ameiagiza Ofisi ya Rais-TAMISEMI ihakikishe kazi hiyo inakamilika kwa wakati na amewataka watendaji hao wahakikishe ukamilishaji wa ujenzi wa vyumba hivyo vya madarasa na utengenezaji wa madawati nafanyika usiku na mchana.

Awali, Naibu Katibu Mkuu Ofisi ya Rais-TAMISEMI, Gerald Mweri alisema kati ya wanafunzi wanaotarajiwa kujiunga na kidato cha kwanza mwaka 2021, wanafunzi 970 watapangwa kwenye shule maalum, 1,059 shule za ufundi, 1,280 bweni kawaida, 803,326 watapangwa katika shule za sekondari za kutwa.

Kwa upande wake, Mkuu wa Mkoa wa Katavi, Juma Homera alisema katika mkoa wake wanafunzi wote waliofaulu watapata nafasi ya kujiunga na kidato cha kwanza 2021 kwa sababu awali walikuwa na upungufu wa vyumba 42 vya madarasa, ambapo wamejenga shule mpya saba zenye vyumba 26 vya madarasa na wamekamilisha maboma 56 na hivyo kuw na ziada ya vyumba 36 vya madarasa.

Kiongozi huyo alisema kuwa mkoa umeweka mkakati wa kuwapeleka wanafunzi wote waliofeli katika vyuo vya maendeleo ya wananchi ili kuwawezesha kujitegemea. “Mpango huu tunautekeleza kwa awam ya pili sasa”.

Naye, Mkuu wa Mkoa wa Lindi, Godfrey Zambi alisema kuwa mkoa wake ulikuwa na upungufu wa vyumba 400 vya madarasa, hadi sasa tayari wamekamilisha ujenzi wa vyumba 380 na kwamba watahakikisha hadi Januari 30, 2021 watakuwa wamekamilisha ujenzi wa vyumba vilivyosalia na wanafunzi wote watachaguliwa katika awamu ya kwanza.

Waziri Mkuu ameiagiza Wizara ya Viwanda na Biashara ikamilishe utaratibu wa kuwa na bei kikomo ya saruji ili kuuwezesha kila mkoa kujua bidhaa hiyo inapaswa kuuzwa kwa bei gani kwa ania ya kuondoa upandishwaji holela unaofanywa na wafanyabiashara wasiokuwa waaminifu.

Aidha, Waziri Mkuu amewataka Mawakala wabadilike na waachane na tabia ya kuficha bidhaa kwa ajili ya  kuzipandisha bei, kwani mtu yeyote akikutwa anatengeneza mazingira ya kufanya bidhaa isipatikane kwa lengo la kupandisha bei huo ni uhujumu uchumi na ikiwa atakutwa na bidhaa ambayo inatafutwa hatua kali za kisheria zitachukuliwa dhidi yake.