Wizara ya Afya waiburuza Habari mchezo wa Kamba wanaume

Imewekwa tarehe: November 9th, 2019

WIZARA ya Afya, Maendeleo ya Jamii, Jinsia, Wazee na Watoto imefanikiwa kuwaburuza Wizara ya Habari, Utamaduni, Sanaa na Michezo katika mchezo wa kuvuta kamba wanaume.

Katika mchezo huo ulioshuhudiwa na Naibu Waziri wa Habari, Utamaduni, Sanaa na Michezo, Juliana Shonza katika uwanja wa michezo wa Jamhuri jijini Dodoma leo asubuhi.

Mchezo huo uliokuwa kivutio kwa maelfu ya wananchi waliojitokeza katika uwanja wa michezo wa Jamhuri ulishuhudia timu ya Wizara ya Afya, Maendeleo ya Jamii, Jinsia, Wazee na Watoto ikiishinda Wizara ya Habari, Utamaduni, Sanaa na Michezo mara mbili katika raundi tatu za mchezo huo.

Kivutio kikubwa katika mchezo huo walikuwa ni makatibu wakuu wa Wizara hizo, Dkt. Zainab Chaula (Afya) na Suzan Mlawi (Habari) waliokuwa mstari wa mbele kuhamasisha mchezo huo.

Mchezo huo ulikuwa ni miongoni mwa michezo inayoendelea katika uwanja wa michezo wa Jamhuri katika tamasha la michezo kuhamasisha watu kupinga magonjwa yasiyoambukiza katika wiki ya kupinga magonjwa hayo kitaifa inayoendelea jijini Dodoma.