Wizara yaja na mwarobaini wa migogoro ya ardhi Dodoma

Imewekwa tarehe: June 30th, 2023

Na. Dennis Gondwe, DODOMA

WIZARA ya Ardhi, Nyumba na Maendeleo ya Makazi imeongeza Kamishna Msaidizi wa Ardhi Mkoa wa Dodoma atakayeshughulikia Halmashauri ya Jiji la Dodoma ili kukabiliana na changamoto za ardhi jijini hapo.

Kauli hiyo ilitolewa na Waziri wa Ardhi, Nyumba na Maendeleo ya Makazi, Dkt. Angeline Mabula alipokuwa akiongea na wananchi wa Halmashauri ya Jiji la Dodoma wenye changamoto za kupewa ‘control number’ na madai ya hatimiliki yaliyochukua muda mrefu katika ukumbi wa Halmashauri ya Jiji la Dodoma.

Dkt. Mabula alisema “kutokana na changamoto ya migogoro ya ardhi katika Halmashauri ya Jiji la Dodoma, tunakwenda kuongeza Kamishna Msaidizi wa Ardhi Mkoa wa Dodoma atakayeshughulikia Halmashauri ya Jiji la Dodoma pekee ili kumpunguzia mzigo wa Halmashauri nyingine za Mkoa wa Dodoma”.

Akiongelea maelekezo yake kwa wataalam wa ardhi, alisema kuwa aliwaelekeza kupanga ratiba ya siku mbili kwa wiki, siku ya Jumanne na Ijumaa kutoka ofisini kwenda katika maeneo ya watu badala ya wananchi kuwafuata ofisini. “Leo nimekuja kusikiliza wananchi ambao wamekalimisha taratibu na malipo ya halmashauri lakini wanahitaji ‘Control number’ kwa ajili ya malipo ya wizara…, Pili wananchi ambao walishakamilisha taratibu zote lakini hatimiliki zao hawajapatiwa” alisema Dkt. Mabula.

Akiongelea migogoro iliyopo katika Halmashauri ya Jiji la Dodoma, Waziri aliitaja kuwa ni migogoro inayotokana na fidia. “Wananchi maeneo yao yalichukuliwa kwa ajili ya maendeleo ya Dodoma tunayoyaona hapa na hawajalipwa fidia zao. Changamoto nyingine ni upimaji shirikishi wa mgawanyo wa asilimia 70 kwa 30. Upimaji huu haukwenda katika utaratibu ule tuliokuwa tunautegemea kama mkoa na halmashauri nyingine zilivyofanya. Nyingine ni ‘double allocation’. Viwanja vilivyokuwa vimemilikishwa na Mamlaka ya Ustawishaji Makao Makuu (CDA) na wataalam wetu wa Halmashauri wakavimilikisha tena watu wengine. Matokeo yake kukawa na migogoro” alisema Dkt. Mabula.

Migogoro mingine inatokana na watanzania kutokuwa na uelewa wa sheria ya Ardhi na migogoro wanayokuwa nayo na hatua ya kutatua migogoro hiyo. “Sisi kama wizara kazi yetu ni kusimamia utekelezaji wa sera na sheria. Utekelezaji wa mpango wa matumizi ya Ardhi na mamlaka ya upangaji miji ni Halmashauri ya Jiji la Dodoma na halmashauri nyingine. Wananchi wamekuwa wakija wizarani kuwasilisha malalamiko yao. Lakini kwa sababu tupo wote Dodoma, tunafanya kazi kama timu moja kwa sababu serikali ni moja” alisema.

Kwa upande wa Mkurugenzi wa Halmashauri ya Jiji la Dodoma, John Kayombo alisema kuwa jiji lake linatakiwa kufidia wananchi takribani viwanja 3,995. “Viwanja 1,035 vipo eneo la Nala, tumeamua kwenda kurejesha viwanja 1,035 kwa wananchi kwa maana ya kwenda kupunguza kwenye viwanja 3,995 na Kamati ya Ugawaji Ardhi imeshakaa kwa hiyo tutakualika kuja kukabidhi hao wananchi viwanja. Mpango wa kukamilisha viwanja 2,960. Kwa mwaka wa fedha ujao halmashauri tunakwenda kupima takribani viwanja 6,000. Viwanja hivyo, tutagawa viwanja 2,960 kwa ajili ya kukamilisha changamoto ya viwanja ambavyo wananchi wanavidai. Naamini kabisa kwa mwaka wa fedha ujao Mheshimiwa waziri tutakwenda kuondoa hiyo changamoto yote, Mungu atusaidie” alisema Kayombo.