Dodoma Jiji FC, KMC ni vita ya Halmashauri leo

Imewekwa tarehe: December 4th, 2020

LIGI Kuu ya soka ya Vodacom Tanzania Bara inaendela tena leo Ijumaa Desemba 4, 2020 kwenye uwanja wa Uhuru Jijini Dar es salaam kwa mchezo wa aina yake utakaozikutanisha timu mbili zinazomilikiwa na halmashauri ambazo ni Dodoma Jiji FC inayomilikiwa na halmashauri ya Jiji la Dodoma na Kinondoni Municipal Council FC iliyo chini ya Halmashauri ya Manispaa ya Kinondoni.

TIMU ya KMC ndiyo watakuwa wenyeji wa mchezo huo unaotarajiwa kuwa mkali na wa ufundi mwingi kutokana na timu hizo kuwa wachezaji wenye uwezo mkubwa uwanjani na kufundishwa na makocha wanaotumia falsafa ya kuchezea mpira na pasi nyingi hususan Mbwana Makata wa Dodoma Jiji FC.

Msemaji wa Dodoma Jiji FC Ramadhani Juma amesema kikosi chao kimejiandaa vizuri na kipo tayari kwa pambano hilo.

Alisema jana Alhamisi timu hiyo ilifanya mazoezi asubuhi na jioni katika uwanja wa Uhuru ambao ndiyo utakaotumika katika mchezo huo.

Juma alisema ari kwa wachezaji wao ipo juu kuelekea mchezo huo hasa baada ya kuisambaratisha Ihefu SC mabao 3-0 kwenye mchezo uliopita.

Mchezo wa leo utapigwa majira ya saa 10:00 jioni ambapo baada ya mchezo huo Dodoma Jiji FC itarejea nyumbani kuikaribisha Gwambina FC ya Mwanza wiki ijayo kwenye uwanja wa Jamhuri.