Balozi Simuli awataka vijana wa Tanzania kushiriki michezo

Imewekwa tarehe: August 21st, 2024

Na Angela Msimbira, UGANDA

Balozi wa Tanzania nchini Uganda, Meja Jenerali  Paul Simuli ametoa rai kwa vijana wote nchini Tanzania kushiriki michezo ili  kupata ajira na kujenga mahusiano na nchi nyingine.

Akizungumza  na wachezaji wa Tanzania wanaoshiriki Mashindano ya 22 ya michezo ya shule za Msingi na Sekondari ya Nchi za Jumuiya za Afrika Mashariki (FEASSSA) yanayofanyika nchini Uganda, Balozi Simuli amesema pamoja na michezo kujenga afya lakini inatoa fursa ya ajira kwa vijana.

"Mmekuja kwenye mashindano haya ni muhimu yanawapa furaha na kuwaunganisha pamoja  vijana wa Afrika Mashariki. Viongozi mtoe kipaumbele kwenye michezo ili tupate vijana mahiri kwa kuwa ni eneo pia linalotoa ajira kwa vijana," amesema.

Amewataka vijana wa Tanzania kujitokeza kwenye michezo kuanzia ngazi ya msingi hadi  sekondari kwa kuwa  Rais wa Jamhuri ya Muungano wa Tanzania Mhe. Dkt.Samia Suluhu Hassan amewekeza fedha nyingi kwenye michezo hivyo ni jukumu la watanzania kuonyesha vipaji vyao na kuleta ushindi.