Buriani Dkt. John Pombe Magufuli

Imewekwa tarehe: March 20th, 2021

RAIS wa Jamhuri ya Muungano wa Tanzania Mhe. Samia Suluhu Hassan leo amewaongoza maelfu ya wakazi wa Jiji la Dar es Salaam kuaga mwili wa aliyekuwa Rais wa awamu ya tano wa Jamhuri ya Muungano wa Tanzania Hayati Dkt. John Pombe Joseph Magufuli katika uwanja wa Uhuru Jijini Dar es Salaam.

Mwili wa kiongozi huyo ulitokea Ikulu kuelekea katika kanisa la Mtakatifu Petro lililopo eneo la Oysterbay ambapo misa ya kuaga mwili wa Dkt. John Pombe Magufuli ilifanyika kisha kupelekwa Uwanja wa Uhuru tayari kwa wakazi wa Dar es Salaam na vitongoji vyake kupata fursa ya kuuaga mwili wa Hayati Dkt. Magufuli.

Aidha, maelfu ya wananchi wenye huzuni na uchungu wa kuondokewa na aliyekuwa kiongozi wao walijitokeza kandokando ya barabara maeneo ya Morocco, Kinondoni, Magomeni, Kigogo, Ilala Boma, Keko, na DUCE wakati mwili wa mpendwa wao ukipita kuelekea uwanja wa Uhuru.

Mawaziri na viongozi wastaafu na viongozi wengine mbalimbali wameshiriki katika tukio hili kubwa la kuuaga mwili wa aliyekuwa Rais wa Jamhuri ya Muungano wa Tanzania Mhe. Dkt. John Pombe Joseph Magufuli.

Dkt. John Pombe Joseph Magufuli alifariki kwa ugonjwa wa moyo tarehe 17 Machi, 2021 saa 12 jioni katika Hospitali ya Mzena iliyopo Jijini Dar es Salaam.