Dkt. Mahenge amuapisha Mafuru kuongoza Jiji la Dodoma

Imewekwa tarehe: August 21st, 2020

Mkuu wa Mkoa wa Dodoma, Dkt. Binilith Mahenge amempongeza Mkurugenzi mpya wa Halmashauri ya Jiji la Dodoma kwa kuteuliwa kushika nafasi hiyo na akimtaka kufanya kazi kwa bidii na kudumisha ushirikiano baina ya Halmashauri hiyo na Ofisi ya Mkoa.

Dkt. Mahenge ameyasema hayo leo baada ya kuapishwa kwa Mkurugenzi mpya wa Jiji la Dodoma, Joseph Mafuru tukio lililofanyika katika ukumbi wa ofisi ya mkuu wa mkoa. Mkurugenzi Mafuru anachukua nafasi ya Godwin Kunambi.

Mkuu huyo wa Mkoa amesema kuwa Jiji la Dodoma liko kwenye makao makuu ya nchi na Kitovu cha shughuli za maendeleo ya nchi yetu, hivyo amemtaka Mkurugenzi huyo kuwa daraja la kuwaunganisha Wafanyakazi wa serikali kuu na serikali za mitaa huku akisisitiza kuwa mafanikio yanatokana na kuwa na umoja.

Aidha, amemtaka Mkurugenzi huyo kuendelea kutatua migogoro ya ardhi pamoja na kuzingatia sheria za Mipango Miji na kuendeleza Jiji kwa kufuata Mpango Kabambe wa Jiji ili kuyafanya makao makuu ya nchi kuwa na muonekano mzuri kwa sababu Dodoma ndio dira ya mikoa mingine nchini.

“Niwaombe watumishi wengine mpeni ushirikiano kijana mwenzenu kwasababu akifanikiwa yeye na ninyi mmefanikiwa kwa hiyo ili mfanikiwe ni lazima wote muwe na ajenda moja ya kuliendeleza Jiji la Dodoma” aliongeza Dkt. Mahenge.

Kwa upande wake Mkurugenzi, Joseph Mafuru amemshukuru Rais wa Jamhuri ya Muungano wa Tanzania, Dkt. John Pombe Magufuli kwa kumteua na kuona kuwa anafaa kuendana na kasi yake, huku akiahidi kufanya kazi kwa bidii na kudumisha ushirikiano ili kuleta maendeleo katika Jiji la Dodoma na Taifa kwa ujumla.

“Maendeleo haya yanayoonekana yametokea kwa viongozi waliotutangulia. Ninamshukuru sana Mkurugenzi aliyepita alitutengeneza tuje kuwa viongozi, na mimi naahidi nitafanya kazi na nitaendana na kazi ya Mheshimiwa Rais kama anavyotaka” aliongeza Mafuru.

Zoezi la kuapishwa Mkurugenzi mpya wa Halmashauri ya Jiji la Dodoma limehudhuriwa na Mkuu wa Mkoa, Katibu Tawala Mkoa, mwakilishi wa Mkuu wa Wilaya ya Dodoma mjini, Wakuu wa Idara na Vitengo wa Halmashauri ya Jiji la Dodoma na waandishi wa habari.

Mkuu wa Mkoa wa Dodoma Dkt. Binilith Mahenge (kulia) akimpongeza Mkurugenzi mpya wa Jiji la Dodoma Joseph Mafuru mara baada ya kumuapisha kushika nafasi hiyo.