Dodoma Jiji FC kuwakabili Geita Gold leo

Imewekwa tarehe: January 15th, 2022

TIMU ya Dodoma Jiji Football Club maarufu kama ‘Walima Zabibu’ leo inarejea kwenye ligi ya NBC Premium League wakiwa wenyeji wa mchezo kwa kupepetana na timu ya Geita Gold kutoka Geita.

Mchezo huo utachezwa katika dimba la Jamhuri Jijini Dodoma majira ya saa 1:00 usiku na Dodoma Jiji wanazitaka pointi 3 muhimu zitakazowaingiza kwenye ‘top four’ ya msimamo wa ligi. Wakati dirisha dogo la usajiri likitarajiwa kufungwa leo saa 6 usiku, Dodoma Jiji imekitumia vizuri kipindi hicho kwa kuwasajiri wachezaji Waziri Junior aliyekuwa Yanga ya Dar es Salaam, Issa Abushee aliyekuwa Coastal Unioni ya Jijini Tanga na mchezaji aliyewahi kuitumikia Simba 'Wekundu wa Msimbazi' Cyprian Kipenye ametua kuitumikia Dodoma Jiji akiwa mchezaji huru. 

Kwa mujibu wa Msemaji wa Dodoma Jiji Football Club, Moses Mpunga ameweka wazi kuwa viingilio katika mchezo wa leo vitakuwa shilingi 5,000 kwa watakaokaa Jukwaa Kuu na shilingi 3,000 kwa majukwaa ya Mzunguko.

Mchezo mwingine utakaochezwa leo ni kati ya Biashara United dhidi ya Kagera Sugar watakaopambana mjini Musoma, mchezo utakaoanza saa 10:00 jioni.