Dodoma Jiji FC moto ule ule, KMC yapigwa tena

Imewekwa tarehe: June 18th, 2021

TIMU ya Dodoma Jiji FC imeanza vyema safari yao ya kukusanya alama 12 katika michezo minne iliyobaki baada ya kurejea kwa michezo ya Ligi Kuu ambayo ilisimama kwa wiki mbili.

‘Walima zabibu’ wa Makao Makuu jana wameigalagaza timu ya ‘Watoto wa Kinondoni’ KMC kwa goli moja kwa bila, lililowekwa kambani na mshambuliaji Dickson Ambundo aliyepokea pasi nzuri kutoka kwa Mcha Khamis mnamo dakika ya 45 ya mchezo uliopigwa katika dimba la Jamhuri Jijini Dodoma.

Akizungumza baada ya mchezo huo Kocha Mkuu wa Dodoma Jiji Mbwana Makata amekipongeza kikosi chake kwa kuonesha mchezo mzuri licha ya KMC kuonesha upinzani mkubwa lakini walikua imara na kuondoka na alama tatu.

Makata amesema kuwa hawatabweteka kwa matokeo hayo bali wanaongeza nguvu katika michezo mingine mitatu iliyobaki ili waweze kufika mpaka nafasi ya nne ya msimamo wa ligi hiyo.

“Kimsingi tunatakiwa kushinda kila mechi ili tuweze kumaliza ligi katika nafasi nzuri hivyo tunapambana ili tuweze kushinda katika michezo yote mitatu iliyobaki” aliongeza Makata.

Dodoma Jiji imebakiza michezo mitatu kumaliza ligi ambayo ni dhidi ya Gwambina ugenini na michezo miwili ya nyumbani dhidi ya Mtibwa pamoja na Yanga.

 Walima zabibu hao wamepanda kutoka nafasi ya tisa mpaka nafasi ya tano ya msimamo wa ligi hiyo huku ikijikusanyia alama 42 katika michezo 32.