Dodoma Jiji FC yaendelelza ubabe Jamhuri

Imewekwa tarehe: February 18th, 2021

TIMU ya Dodoma Jiji FC jana tarehe 17 ya Februari, 2021 imeendeleza ubabe wa kutofungwa katika uwanja wake wa nyumbani (Jamhuri Dodoma) baada ya kupata ushindi mara mbili mfululizo na kujikusanyia pointi sita katika mzunguko wa pili wa Ligi Kuu ya Vodacom Tanzania Bara kwa kuifunga Coastal Union magoli mawili kwa moja.

Magoli hayo yaliwekwa kimiani na Anuary Jabir katika dakika ya 57, na goli la pili likifungwa na Jamal Mtegeta mnamo dakika ya 69 ya mchezo huku pasi za magoli hayo zikipigwa na Dickson Ambundo.

Akizungumza baada ya mchezo huo Kocha Mkuu wa Timu hiyo Mbwana Makata amekipongeza kikosi chake, mashabiki pamoja na benchi la ufundi kwa ushindi huo huku akisisitiza kuwa dhamira kubwa ni kuhakikisha wanaondoka na pointi zote tisa katika michezo mitatu ya nyumbani ambapo tayari wameshapata pointi sita kati ya hizo.

"Mchezo wetu unaofuata ni dhidi ya Police Tanzania, tunajua hautakua mchezo rahisi ukizingatia walitufunga kwao katika mchezo uliopita lakini hiyo haitutoi mchezoni bali inatupa hasira ya kwenda kulipiza kisasi" Alisema Makata.

Dodoma Jiji FC ambayo ilionekana kusuasua katika kipindi cha mwanzoni mwa ligi imeonekana kuimarika kutokana na majeruhi wote wa timu hiyo kupona, maingizo ya wachezaji wakati wa dirisha dogo na Mwalimu kupata muunganiko mzuri unaoisaidia timu kupata matokeo.