Dodoma Jiji FC yaiduwaza Mtibwa Morogoro

Imewekwa tarehe: December 24th, 2020

TIMU ya Dodoma Jiji FC iliyo chini ya Halmashauri ya Jiji la Dodoma jana Jumatano Disemba 23, 2020 iliiduwaza Mtibwa Sugar ya Morogoro kwenye uwanja wa Jamhuri Mkoani humo kwa kuichapa bao 1-0 kwenye mfululizo wa michezo ya ligi kuu ya soka Tanzania Bara.

Bao pekee lililoizamisha Mtibwa jana liliwekwa nyavuni na mshambuliaji Seif Abdallah Rashid Karihe katika dakika ya tatu akiunganisha mpira wa adhabu uliopigwa na Mcha Khamis baada ya Peter Mapunda kufanyiwa faulo nje kidogo ya eneo la kumi na nane la Mtibwa.

Ushindi huo unaiweka Dodoma Jiji katika nafasi ya nane kwenyen msimamo huku ikiwa na mchezo mmoja wa kiporo dhidi ya Simba utakaopigwa kwenye dimba la Jamhuri Dodoma katika tarehe itakayopangwa na bodi ya ligi.

Kocha Mkuu wa kikosi hicho Mbwana Makata alisema mchezo ulikuwa mgumu lakini anawapongeza wachezaji wake kwa kutopoteza umakini katika muda wote wa mchezo hali iliyowahakikishia pointi tatu za msingi katika mchezo huo wa mwisho katika mzunguko wa kwanza wa ligi hiyo.  

Timu hiyo inatarajiwa kurejea Jijini Dodoma leo Alhamisi kwa ajili ya kujiweka sawa kwa mchezo wa kombe la shirikisho dhidi ya Hollywood FC ya Songwe kwenye uwanja wa Jamhuri.