Dodoma Jiji FC yapania pointi tatu Ruangwa

Imewekwa tarehe: October 30th, 2020

TIMU ya Dodoma Jiji FC inayomilikiwa na Halmashauri ya Jiji la Dodoma inatarajia kushuka dimbani kesho Jumamosi Oktoba 31, 2020 kwenye dimba la Majaliwa wilayani Ruangwa mkoa wa Lindi  kuwakabili wenyeji Namungo FC katika mchezo wa ligi kuu ya Vodacom Tanzania Bara.

Mchezo huo unatajariwa kuwa mgumu kwa pande zote kutokana na ubora wa timu hizo ambapo Dodoma Jiji chini ya kocha Mkuu Mbwana Makata inashiriki ligi hiyo kwa mara ya kwanza tofauti na Namungo ambayo inashiriki kwa msimu wa pili sasa.

Dodoma Jiji FC itaingia kwenye pambano hilo ikiwa nafasi ya sita kwenye msimo kwa ligi baada ya michezo ya nane huku Namungo ikiwa katika nafasi ya 11.

Kocha Mkuu Makata alisema amekiandaa kikosi chake vizuri na wataingia kwa tahadhari kubwa kwenye mchezo huo wa ugenini na kwamba watambana kupata pointi zote tatu ili kujiimarisha Zaidi kwenye msimamo wa ligi hiyo.

Naye Afisa Habari wa Dodoma Jiji FC Ramadhani Juma alitoa wito kwa mashabiki na wadau wote wa timu hiyo kuendelea kuwa karibu na timu yao ili waweze kufikia malengo na kupata mafanikio ambayo kila mkazi wa Dodoma na madau wa timu hiyo anayatarajia.

Mchezo huo utachezwa saa 10:00 jioni, ambapo michezo kadhaa ya ligi hiyo pia itachezwa ikiwa ni mzunguko wa tisa.