Dodoma Jiji, Mtibwa zatoka suluhu

Imewekwa tarehe: July 15th, 2021

LIGI Kuu ya soka Tanzania Bara iko ukingoni huku timu mbalimbali zikipambana kuhakikisha zikimaliza vizuri ili kuondokana na janga la kushuka daraja. Leo timu zote zinazoshiriki ligi hiyo zimeshuka dimbani katika viwanja mbalimbali nchini huku 'Walima Zabibu' Dodoma Jiji FC wakiikaribisha Mtibwa Sugar katika dimba la Jamhuri Jijini hapa saa 10:00 jioni na mchezo huo kumalizika kwa timu hizo kutoshana nguvu kwa sare ya kutofungana. Akizungumza baada ya mchezo huo kocha Mkuu wa Dodoma Jiji Mbwana Makata amesema kuwa wameyapokea matokeo hayo licha ya timu yake kupata nafasi kadhaa za wazi na kushindwa kuzitumia aidha kwa kukosa umakini au kujiamini kupita kiasi kwa baadhi ya wachezaji wake. “Kuna nafasi za wazi tulizipata lakini nahisi kujiamini kukizidi sana nako ni changamoto hivyo tumeyapokea matokeo na tunajipanga kwa mchezo wetu unaofuata dhidi ya Yanga ambao tunahitaji sana kushinda mchezo huo ili kujiweka kwenye nafasi nzuri.” Alisema Makata. Makata amewaomba mashabiki kuendelea kuisapoti timu hiyo huku akiwaahidi ushindi katika mchezo mmoja uliobaki utakaochezwa Jumapili ya tarehe 18/07/2021 dhidi ya wanajangwani 'Timu ya wananchi'. Timu ya Dodoma Jiji imeshacheza michezo 33 ikikusanya jumla ya alama 43 huku ikiwa katika nafasi ya 7 ya msimamo wa ligi hiyo.