Halmashauri zaagizwa kutenga asilimia 10 kutunza Mazingira

Imewekwa tarehe: February 17th, 2021

HALMASHAURI zote nchi zimetakiwa kutenga asilimia 10 ya mapato ya ndani kwa ajili ya utekelezaji wa shughuli za kuhifadhi na kusimamia mazingira katika maeneo yao.

Agizo hilo limetolewa leo na Naibu Waziri Ofisi ya Makamu wa Rais (Muungano na Mazingira) Mhe. Mwita Waitara kwa nyakati tofauti alipofanya ziara mkoani Tabora.

Akiwa katika ziara hiyo Waitara alisema kuwa kwa kutenga fedha hizo kutazisaidia halmashauri hizo kuweza kupata vitendea kazi vitakavyotumika katika usafi wa mazingira.

“Huwezi kusema unazoa taka wakati huna hata vitenfdea kazi kwa hiyo halmashauri zinapaswa kutenga asilimia kumi ya bajeti zao kwa mwaka na kuweka mikakati ya kutunza mazingira,” alisema.

Aidha alitoa wito kwa halmashauri zote kuhakikisha vinaundwa vikundi vitakavyojishusisha na uzoaji taka mitaani ili kuweka maeneo yao katika hali ya usafi.