Hospitali ya Mirembe yapokea gari ya Wagonjwa

Imewekwa tarehe: December 8th, 2023

MKUU wa Mkoa wa Dodoma, Rosemary Senyamule leo Disemba 8, 2023, amezindua gari mbili za Hospitali ya Taifa ya Afya ya akili Mirembe iliyopo katika Kata ya Hazina Jijini Dodoma ambapo kwa kipindi kirefu Hospitali hii imekua ikikabiliwa na ukosefu wa vitendea kazi hivi.

Akizindua gari hizi ambazo moja ni kwa ajili ya kubebea wagonjwa na nyingine ni kwa matumizi ya kazi za kawaida za Hospitali, Senyamule amesisitiza utunzaji wa vitendea kazi hivi.

"Serikali ya awamu ya Sita wakati huu imekua na kasi kubwa ya kuimarisha huduma za afya na kwa Mkoa wetu wa Dodoma kila ngazi imeimarika kwa nafasi yake. Kwa mwaka huu pekee kumekua na uzinduzi wa gari za wagonjwa ambapo Mkoa wetu umepata jumla ya gari 30 ambapo 10 ni kwa ajili ya kazi na 20 kwa ajili ya kubeba wagonjwa.

"Natoa shime kwa watumiaji wa gari hizi kuzitumia kwa utaratibu na miongozo ili ziweze kudumu kama ilivyotarajiwa hivyo vitendea kazi hivi vitumike vizuri. Afya ya akili ni tatizo linalohitaji kushughulikiwa mapema ili lisikufikishe sehemu mbaya. Huduma munayoitoa ikifikia watu wengi, itatengeneza utashi zaidi." Amesema Senyamule.

Hata hivyo, Mkurungenzi Mtendaji wa Hospitali ya Mirembe Dr. Paul Lawala, ameishukuru Serikali kwa kuona umuhimu wa kuleta vitendea kazi kwenye Hospitali hii kwani hapo awali walikua wakipata changamoto kwenye utekelezaji wa huduma hasa linapohitajika suala la usafiri kwani kwa Sasa wamepanua huduma za Hospitali za dharura na mahututi hivyo ujio wa gari hizi umefika wakati muafaka kutatua changamoto hiyo.