Kocha Makata aahidi zawadi ya mwaka mpya kwa mashabiki wa Dodoma Jiji FC

Imewekwa tarehe: January 1st, 2021

Kikosi cha Dodoma Jiji FC kinachoshiriki ligi Kuu Tanzania Bara kipo Mkoani Shinyanga, kwa mchezo dhidi ya Mwadui FC katika mchezo namba 17 wa Ligi kuu utakaochezwa leo siku ya mwaka mpya tarehe 1.1.2021 ndani ya dimba la Mwadui Complex saa nane mchana.

Kikosi hicho kinachojumuisha wachezaji 20 pamoja na viongozi tisa kitawakosa wachezaji wake wawili kiungo mkabaji Rajabu Mgalula ambaye ana majeraha aliyoyapata wakiwa mazoezini pamoja na golikipa namba moja Aron Kalambo ambae ana kadi tatu za njano.

Akizungumza mjini Shinyanga Kocha Mkuu wa Dodoma Jiji FC amesema kuwa wanamshukuru Mungu kwa kufika salama na hali za wachezaji ziko vizuri kwa ajili ya mchezo huo.

Aidha amewatoa hofu mashabiki wa timu hiyo kutokana na kuwakosa wachezaji wake wawili kwa kusema kuwa kila mchezaji ana mbadala ndani ya timu hivyo nafasi zao zitachezwa na wachezaji wengine wenye uwezo na uzoefu na kuahidi kupata pointi tatu katika mchezo huo.

“Mwadui sio timu ndogo ndio maana inashiriki Ligi Kuu hivyo tumechukua tahadhali zote za kimichezo na tumejipanga kuhakikisha tunarudi nyumbani na pointi tatu na hii ndio itakua zawadi nzuri ya mwaka mpya kwa wana Dodoma na mashabiki wote wa Dodoma nchi nzima.” Ameongeza Makata.

Aidha, katika ukurasa rasmi wa timu ya Dodoma Jiji FC wameandika kuwa "Tunachukua fursa hii kumshukuru Mungu muumba wa mbingu na Dunia kwa wema na fadhili zake tumeingia mwaka mwingine 2021. 

Mwaka 2020 ulikuwa mwaka wa mafanikio sana kwetu na mashabiki wetu kwani tuliweza kutwaa Kombe la Ligi Daraja la Kwanza na kufanikiwa kupanda Ligi Kuu ya Vodacom Premier League - VPL..

Tunawashukuru mashabiki wetu kwa kuwa nasi bega kwa bega na tunawaahidi kuwa hatutawaangusha. Vile vile tunaishukuru Halmashauri ya Jiji la Dodoma, Viongozi wa timu, benchi la ufundi pamoja na wachezaji wote kwa kujitoa kwao kuipigania timu yetu pendwa.

Mwaka 2021 ni mwaka wa mapambano na mavuno kwa klabu yetu".

HERI YA MWAKA MPYA 2021!