Mabaraza ya Wafanyakazi yatumike kuogeza tija mahala pa kazi

Imewekwa tarehe: March 13th, 2024

WAZIRI wa Nchi, Ofisi ya Rais, Tawala za Mikoa na Serikali za Mitaa Mohamed Mchengerwa amesema mabaraza ya wafanyakazi ni chombo cha kisheria kinacholenga kuongeza tija na uwajibikaji mahali pa kazi.

Maelekezo hayo yametolewa jijini Dodoma na Naibu Waziri wa Ofisi ya Rais TAMISEMI  Deogratius Ndejembi kwa niaba ya Waziri Mohamed Mchengerwa kwenye ufunguzi wa baraza la wafanyakazi wa ofisi ya Rais - TAMISEMI leo tarehe 13.03.2024.

“Mabaraza ya wafanyakazi yatumike kujadili malengo na mipango ya taasisi ikiwamo maslahi ya watumishi, mnatakiwa kujadili utendaji kazi wenu wa kila siku,”alisema.

Hata hivyo, alihimiza usimamizi wa mipango ya bajeti ili kufikisha huduma bora kwa wananchi.

Kadhalika, alisema serikali itaendelea kutatua kero zilizopo ikiwamo uhaba wa wafanyakazi.

Naye, Kaimu Katibu Mkuu, Dk.Charles Msonde alisema kikao hicho cha baraza pamoja na mambo mengine kitajadili na kupitisha bajeti ya ofisi ya Rais - TAMISEMI kwa mwaka 2024/25.

Naibu Katibu Mkuu wa Ofisi hiyo, Dk.Wilson Mahera aliahidi watumishi wa TAMISEMI watatekeleza ipasavyo maelekezo yaliyotolewa na serikali.