Mavunde agawa vifaa vya kujikinga na Corona

Imewekwa tarehe: June 1st, 2020

MBUNGE wa Jimbo la Dodoma Mjini, Anthony Mavunde amekabidhi msaada wa vifaa vyenye thamani ya zaidi ya shilingi milioni mbili kwa ajili ya kujikinga na ugonjwa wa Covid-19 unaosababishwa na virusi vya Corona kwa shule zote zenye kidato cha tano na sita katika Halmashauri ya Jiji la Dodoma.

Msaada huyo ameukabidhi leo kwa Afisa Elimu Sekondari wa Halmashauri ya Jiji la Dodoma Upendo Rweyemamu kwenye hafla fupi iliyofanyika katika viunga vya Halmashauri hiyo.

Mavunde amesema kuwa vifaa alivyotoa vinalenga kuwahakikishia wanafunzi wa kidato cha sita wanakuwa salama katika kipindi chote watakachokuwa shuleni. “Leo nipo hapa Halmashauri ya Jiji la Dodoma kutoa msaada wa vifaa vya kujikinga na ugonjwa wa covid-19 kwa shule zote za serikali na binafsi katika Jimbo la Dodoma Mjini. Ombi langu kwa wanafunzi katika Jimbo la Dodoma Mjini ni kuendelea kuchukua tahadhari zote za kujikinga na maambukizi ya virusi vya Corona. Viongozi tutahakikisha wanafunzi wote wa kidato cha sita wanafanya mitihani kwa usalama mkubwa” alimalilzia Mavunde.

Mbunge huyo ambaye pia ni Naibu Waziri Ofisi ya Waziri Mkuu anayeshughulikia kazi, ajira, vijana na watu wenye ulemavu aliwatakia heri wanafunzi wa kidato cha sita katika mitihani yao. Alimuomba Mungu kuwawezesha wanafunzi hao kufanya vizuri na kufaulu vizuri mitihani yao.

Aidha, alimshukuru Rais wa Tanzania kwa uamuzi wake makini kuruhusu shule za kidato cha sita kufunguliwa. “Napenda kumshukuru sana Mheshimiwa Rais, Dkt. John Magufuli kwa uamuzi wake makini na madhubuti kuhakikisha wanafunzi wa kidato cha sita wanarejea shuleni kuanzia leo tarehe 1 mwezi Juni kujiandaa na mitihani yao ya kidato cha sita” amesisitiza Mhe. Mavunde.

Vilevile, aliwashukuru wakuu wa idara ya Elimu Msingi na Sekondari kwa ushirikiano mzuri wanaompatia kutekeleza majukumu yake. “Ninajivunia sana wakuu hawa wa idara kwa kazi nzuri wanayofanya katika Jiji la Dodoma. Nawashukuru pia wakuu wa shule na waratibu elimu kata kwa kazi nzuri wanayofanya” aliongeza Mavunde.

Kwa upande wake, Afisa Elimu Sekondari wa Halmashauri ya Jiji la Dodoma, Mwalimu Upendo Rweyemamu alisema kuwa mbunge huyo anafanya kazi kubwa kukuza sekta ya elimu. Napenda kumshukuru sana Mheshimiwa Mbunge wa Jimbo la Dodoma mjini kwa kazi kubwa, amekuwa mstari wa mbele sana katika kukuza elimu. Mbunge huyu ni mpambanaji sana hivyo, ameona atoe vifaa vya kupambana na virusi vya corona katika shule zote 11 zilizopo katika Halmashauri ya Jiji ili wanafunzi wetu wawe salama.

Nae mkuu wa shule ya sekondari ya Maria De Mattias, Mwalimu Lowaeli Lyimo akiongea kwa niaba ya wakuu wa shule, alimshukuru Mbunge huyo kwa kuwa bega kwa bega na shule za serikali na binafsi katika halmashauri ya Jiji la Dodoma. “Mbunge huyu amekuwa karibu sana na shule kwa kuzitembelea na kuongea na wanafunzi na kuwatia moyo katika masomo yao. Tunamshukuru sana kwa kutoa msaada huu kwa shule za jiji la Dodoma” alisema Mwalimu Lyimo. Vilevile, aliwashukuru maafisa elimu wa Halmashauri kwa ushirikiano wanaoutoa kwa shule hizo na kuitaka jamii kuendelea kuwaombea wanafunzi hao waweze kufanya mitihani yao na kufaulu vizuri.

Vifaa vya kujikinga na virusi vya corona vilivyokabidhiwa ni majaba makubwa ya kuhifadhi 160, ndoo 44, sabuni ya maji zaidi ya lita 300 na sabuni za kawaida na vitakasa mikono vyote vikiwa na gharama ya shilingi milioni mbili.

Mbunge wa Jimbo la Dodoma Mjini, Anthony Mavunde (kulia) akimkabidhi vitakasamikono Mkuu wa Shule ya Sekondari ya Maria De Mattias, mwlimu Lowaeri Lyimo (kushoto). katikati ni Afisa Elimu Msingi Jiji la Dodoma, Mwalimu Joseph Mabeyo akishuhudia tukio hilo

Mbunge wa Jimbo la Dodoma Mjini, Anthony Mavunde (kulia) akiongea na Waandishi wa habari wakati wa hafla ya kukabidhi vifaa vya kujikinga na virusi vya corona kwa shule zenye kidato cha tano na sita jijini Dodoma. Kushoto ni Afisa Elimu Msingi Jiji la Dodoma, Mwalimu Joseph Mabeyo.

Mbunge wa Jimbo la Dodoma Mjini Anthony Mavunde (katikati) akifurahia jambo na Afisa Elimu Sekondari Jiji la Dodoma, Mwalimu Upendo Rweyemamu (kulia), Kushoto ni Afisa Elimu Msingi Mwalimu Joseph Mabeyo.