Jiji la Dodoma lakopesha Bil 1.38 Vikundi vya Wajasiriamali

Imewekwa tarehe: November 2nd, 2022

Na. Dennis Gondwe, DODOMA

HALMASHAURI ya Jiji la Dodoma imetoa mikopo yenye thamani ya shilingi 1,389,552,700 kwa vikundi 102 vya wanawake, vijana na watu wenye ulemavu kutoka mapato ya ndani ya halmashauri kwa lengo la kuviwezesha kiuchumi katika pindi cha Mwezi Julai hadi Septemba, 2022.

Kauli hiyo ilitolewa na Mkurugenzi wa Halmashauri ya Jiji la Dodoma, Joseph Mafuru alipokuwa akiwasilisha taarifa ya utoaji mikopo ya asilimia 10 kwa vikundi vya wanawake, vijana na watu wenye ulemavu katika kipindi cha Julai-Septemba, 2022 tukio lililofanyika katika bustani ya mapumziko ya Chinangali iliyopo katikati ya Jiji la Dodoma.

Mkurugenzi Mafuru alisema kuwa katika kipindi cha Julai-Septemba, Halmashauri ya Jiji la Dodoma ilipokea maombi ya mikopo yenye thamani ya shilingi 5,813,813,500 kutoka kwa vikundi 198 vya wanawake, vijana na watu wenye ulemavu. “Baada ya uchambuzi, jumla ya vikundi 102 viliidhinishwa kupewa mikopo yenye thamani ya shilingi 1,389,552,700 ambapo vikundi 46 vya wanawake vimekopeshwa shilingi 501,000,000, vikundi 33 vya vijana vimekopeshwa shilingi 693,294,100 na vikundi 23 vya watu wenye ulemavu vimekopeshwa shilingi 195,258,600” alisema Mkurugenzi Mafuru.

Akiongelea mchanganuo wa fedha hizo, alisema kuwa fedha hizo ni mchango wa halmashauri na marejesho. “Kati ya fedha zilizokopeshwa kwa vikundi, shilingi 467,481,558.41 ni mchango wa halmashauri wa asilimia 10 wa mapato ya ndani na shilingi 922,071,141.59 ni fedha za marejesho. Vikundi hivi vitaanza kufanya marejesho mwenzi Februari, 2023” alisema Mkurugenzi Mafuru.