Ofisi wazi kuchukua na kurejesha fomu za wagombea wa nafasi za uongozi

Imewekwa tarehe: November 1st, 2024

Na. Asteria Frank, DODOMA

Vituo 222 vya Ofisi za Mitaa ya Jiji la Dodoma vitafunguliwa mapema leo tarehe 1 Novemba, 2024 kwa lengo la kuhakikisha kila mgombea wa nafasi ya uongozi wa Serikali za Mitaa anachukua na kurejesha fomu, ikiwa ni siku ya mwisho ya zoezi hilo kwa mujibu wa ratiba ya Uchaguzi wa Serikali za Mitaa.

Kauli hiyo ilitolewa na msimamizi wa uchaguzi wa Serikali za Mitaa Jiji la Dodoma, Dkt. Frederick Sagamiko asubuhi ya leo katika ofisi yake wakati akizungumza na waandishi wa Habari kubarisha umma kuhusu kutamatika kwa zoezi la uchukuaji na urejeshaji wa fomu za kugombea uongozi wa Serikali za Mitaa.

Dkt Sagamiko alisema “hakuna ofisi yeyote katika Jiji la Dodoma ambayo itafungwa wakati zoezi hilo likiendelea, naomba nitoe Rai kwa viongozi wa vyama vyote 19 vya siasa kuhakikisha wanatumia siku hii muhimu ambayo ni siku ya mwisho kuchukua na kurejesha fomu kuanzia saa 2:00 asubuhi hadi saa 10:00 jioni, Ofisi zote zitakuwa wazi kwa masaa nane”.

Aidha, aliwataka wananchi kuwa makini dhidi ya upotoshaji wowote wa taarifa usio rasmi nje na ofisi ya Msimamizi wa uchaguzi kuhusiana na mchakato huo.