'TWENZETU KUTALII', utalii wa ndani ruksa kwa wote

Imewekwa tarehe: September 1st, 2019

Waziri wa Maliasili na Utalii Dkt. Hamisi Kigwangalla amezindua rasmi Kampeni inayoitwa TWENZETU KUTALII iliyoandaliwa na MISS Tanzania 2018, Queen Elizabeth Makune kuhamasisha Utalii wa ndani, uzinduzi uliofanyika katika hoteli ya Serena, Dar es Salaam, Agosti 30, 2019.

Akizungumza wakati wa uzinduzi wa Kampeni hiyo, Dkt. Kigwangalla amewapongeza waandaaji wa tukio hilo kwa kuunga mkono juhudi za Serikali za kutangaza Utalii ndani na nje ya nchi.

Amesema ipo haja ya viongozi na watu mashuhuri wakiwemo wasanii  kutumika kutangaza Utalii uliopo nchini.

Amewataka wasanii wa Filamu waandae filamu itakayoonesha na kubeba maudhui ya kuvitangaza Vivutio vya Utalii vilivyopo hapa nchini.

Aidha, ameiagiza Bodi ya Utalii Tanzania (TTB) iendelee kutoa ushirikiano kwa Balozi huyo wa Utalii Miss Tanzania 2018, Queen Elizabeth Makune kutokana na juhudi zake za kutangaza Utalii kwa vitendo.

Pia ameiagiza TANAPA ianze kufanya mchakato wa kununua Meli mpya ya Kitalii itakayotumika Pwani ya Bahari ya Hindi.