Waganga Wafawidhi wa Jiji la Dodoma wapatiwa mafunzo ya Mfumo wa NeST

Imewekwa tarehe: January 29th, 2025

Na. Halima Majidi, DODOMA

Waganga wafawidhi kaitka Halmashauri ya Jiji la Dodoma wamewezeshwa mafunzo ya ununuzi kwa njia ya mfumo serikalini ‘National e- Procurement System of Tanzania’ (NeST) yatakayoongeza ufanisi na kurahisisha utendaji wa kazi pamoja na kupunguza hoja za ukaguzi kwa sababu kila kitu kitakuwa kipo wazi.

Mafunzo hayo yalitolewa na Kitengo cha Manunuzi na Ugavi cha Halmashauri ya Jiji la Dodoma, kwa lengo la kuongeza ufanisi, kupunguza gharama pamoja na kuokoa muda, ambayo yalifanyika katika Ukumbi wa Shule ya Sekondari Umonga.

Mwezeshaji wa Mafunzo hayo, Josephat Nyumayo, alieleza kuwa, mafunzo hayo yalikuwa yanahusu matumizi ya mfumo wa ‘NeST’ katika ngazi ya kata kwa mujibu wa Sheria ya Manunuzi ya Mwaka 2023 na Kanuni zake za Mwaka 2024, ikiwa ni utekelezaji wa agizo la serikali kuwa manunuzi yote yafanyike kwa mfumo huo.

Aidha, Nyumayo alisema kuwa, mafunzo hayo ni ya awamu ya pili kwa waganga wafawidhi ambapo mafunzo ya awali yalikuwa yanahusu matumizi sahihi ya mfumo wa ‘NeST’ na leo wameongeza kipengele cha uundaji wa kamati ambazo zimeleta mabadiliko kulingana na muongozo pamoja na sheria mpya. “Mwanzo kulikuwa na kamati tatu ambazo ni kamati ya ujenzi, manunuzi na mapokezi kwa mujibu wa sheria iliyofanyiwa marekebisho na muongozo uliotoka unahusisha kamati mbili, kamati tendaji na kamati ya mapokezi na majukumu ambayo yalikuwa yanafanywa na kamati ya manunuzi yatafanywa na Afisa Manunuzi alierasimishwa madaraka hayo” alisema Nyumayo.

Nae, Mganga Mfawidhi wa Zahanati ya Kikuyu, Azania Silliah, alisema kuwa anamshukuru Mkurugenzi wa Halmashauri ya Jiji la Dodoma kwa kuwapatia mafunzo hayo, kwa sababu ameweza kutumia mfumo huo kwa kufanya manunuzi na kutoa tuzo kwa wale ambao wameomba ili waweze kupatiwa mahitaji.

“Kwahiyo, nawashauri waganga wafawidhi wenzangu na watu wengine, haya mafunzo ni mazuri, tusiyaogope kwanza ni ya uwazi pia yanaepusha hoja za ukaguzi maana kila kitu kipo wazi” alishauri Silliah.

Kwa upande wake, Mtumishi wa Zahanati ya Chololo, Samwel Karidushi, alisema kuwa, mafunzo ameyapokea vizuri, ataenda kuwaelekeza na kuwa mwalimu kwa watumishi wenzake ili kurahisisha uagizaji wa vifaa. “Mfumo huu unalenga kusaidia kupunguza gharama ikiwemo nauli za uagizaji wa vifaa pamoja na ufuatiliaji wa taarifa mbalimbali katika taasisi” alisema Karidushi.

Vilevile, Mganga Mfawidhi wa Zahanati ya Chididimo, Isaka Witiche, alisema kuwa, anamshukuru Mkurugenzi kwa Jiji la Dodoma, kwa kushirikiana na Ofisi ya Mganga Mkuu wa Jiji la Dodoma, kwa kuwapatia mafunzo ya manunuzi kwa njia ya kidigitali na kuahidi kwenda kuyatekeleza. “Kama tulivyoelekezwa kununua vifaa kwa njia ya kidigitali tutaenda kuhakikisha tunaleta mabadiliko katika vituo vyetu vya kazi” alisema Witiche.